Morepresentar na sab si naturalized player Andray Blatche sa Pilipinas ug ning higayuna, ubos sa kampo sa Mighty Sports Philippines nga mokombati sa 2020 Dubai International Basketball Tournament karong Enero sa sunod tuig.
Nagkanayon si Mighty Sports coach Charles Tiu nga ang presensya sa kanhi magduduwa sa National Basketball Association (NBA) makahatag kanila og lig-ong haligi nga ilang gikinahanglan.
“Actually, we’ve wanted to get him for a while. I know he’s motivated to have a better showing representing the Philippines. We tried to get them both in the Jones Cup but it didn’t happen so now we have a chance,” matod ni Tiu sa interbyu sa Spin.ph.
Gumikan kay usa man siya ka naturalized player, si Blatche moduwa isip usa ka local player.
Si Blatche katapusang miduwa sa nasod sa 2019 Fiba World Cup sa China diin nangiwit ang Gilas Pilipinas.
Dugang ni Tiu nga makatabang sab og dako si Blatche sa paggiya sa batan-ong higante nga si 7’2” Kai Sotto.
“He’s always wanted to be a mentor for Kai. Plus Andray can play as a local so it’s great for us,” pasabot ni Tiu. / ESL