NIADTONG Disyembre 15, gisaulog ang Simbang Gabi didto sa St. Peter’s Basilica sa Roma. Sa unang higayon sa kasaysayan sa maong nobenaryo usa ka Santo Papa ang nagsaulog niini inubanan sa kapin sa pito ka libo ka mga Pilipino. Dako kaayo ang dungog sa Pilipinas ug giila ang sakripisyo sa daghan kaayong mga OFWs. Gani miingon si Papa Francisco nga kita kunong mga Pilipino “smugglers sa Kristohanong pagtuo”. Giila ang atong pagkamisyonero sa tibuok kalibotan.
Sa ebanghelyo karong adlawa, gihisgotan nga ang katumanan sa gitagna ni propheta Isaias nga ang usa ka dalaga magmabdos, ug manganak og anak nga lalaki, ug pagatawgon siya og Emmanuel. Ang dalaga mao ang Birhen Maria, ulay nga sinayoran ni Jose. Magsabak siya og batang lalake pinaagi sa paglalang sa Espiritu Santo. Ang batang Jesus mao ang Dios nga nagauban kanato (“Emmanuel”).
Ang Emmanuel uban kanato sukad pa sa sinugdanan sa pagpaila sa Kristiyanismo sa atong kabaybayonan. Usa sa mga timailhan sa presensya sa Ginoo mao ang atong kasaulogan sa Simbang Gabi nga, sa akong panahom, mas maayo nga tawgon og Misa de Gallo. Ang “gallo” gipasabot “sunoy” kay ang maong misa alas 3 o alas 4 sa kadlawon.
Usa kini ka panagsabot tali sa simbahan ug sa mga mag-uuma nga buot mosaulog sa Adbyento apan kinahanglan mosayo sa ilang umahan aron magbudlay didto. Ang bunga mao ang usa ka ka misa sa kadlawon. Dako pud kaayo nga posibilidad nga gikan kini sa Mexico. Karon, latas sa mga katuigan, sugaton nato ang Pasko pinaagi sa Misa de Gallo.
Kining pagkamisyonero nato sa tibuok kalibotan usa ka reyalidad nga nindot kaayong pamalandongan ilabina sa umaabot nga 500 ka tuig nga kasumaran sa Kristiyanismo karong 2021. Sa pulong pa si San Pablo sa sulat niya ngadto sa mga taga-Roma, ang mga binunyagan “nakadawat sa grasya sa pagkaapostol, aron pagdala sa pagkamasinugtanon sa pagtuo, alang sa iyang ngalan, ngadto sa tanang mga gentil...”
Kining tawag ug grasya nga gihisgotan ni Pablo nadawat natong mga Pilipino pinaagi sa usa nga katingalahan nga paagi, nga mao ang atong pagka-OFWs. Makaingon gyod ko nga ang pagkahimo natong instrumento isip mga OFWs sa paghatag og kadasig sa daghang mga nagluya o patay nga mga parokya sa ubang lugar, adunay kalambigitan sa atong pagsaulog sa Misa de Gallo. Kini mang god nga kasaulogan nagbansaybansay nato sa pagkamaabiabihon ug pagtinabangay.
Diha sa katapusan sa Simbang Gabi kuyog ni Papa Francisco, ang huni nga gikanta mao ang “O Maria Rayna sa Pilipinas”. Makapangtimbawot og balhibo ug makatandog kaayo nga ang katapusang kanta Binisaya. Siya ang unang “smuggler” sa Kristohanong pagtuo pinaagi sa iyang pagsanong sa tawag sa Ginoo. Hangtod karon siya ang atong kaubang sa misyon sa pagpahibalo sa Emmanuel ngadto sa tibuok kalibotan.
Unsa may imong gikatampo sa pagka-“smuggler” sa Kristohanong pagtuo?