TINGUHA ni Asian Para Games 2018 swimming triple gold medalist Ernie Gawilan nga panalipdan ang iyang medalyang bulawan sa men’s 400-meter freestyle S7 sa 10th Association for Southeast Asian (Asean) Para Games, kon diin ang nasud maoy mo-host sa Marso 2020, inay sa Enero 18 hangtud 25.
Ang 28-anyos, kinsa lumad nga taga Paquibato District ug nakakat-on nga molangoy sa Island Garden City of Samal gikan sa iyang lolo kinsa maoy nagsagop kaniya sa dihang nailo, nagsulti, “Paningkamutan nako nga makuha gihapon nako ang 400-meter freestyle.”
Matud niya nga ang pagwarak og bag-o sa iyang rekord di imposible ning panahona sama niadtong 2015.
“Gusto unta nako mag-break na pod ang akong record pero mora’g alanganin ko kay 25 meters ra ko nag-train. Bag-o lang mi nag-training sa 50 meters,” pagtin-aw ni Gawilan atol sa paghinabi uban sa SunStar Davao didto sa PhilSports dorm canteen niadtong Disyembre 12, 2019.
Sa 9th Asean Para Games gilusad sa Kuala Lumpur, Malaysia, ang Rio Paralympian nibitbit pauli og kinatibuk-ang duha ka bulawan ug duha ka bronseng medalya.
Ang iyang laing bulawang medalya mao kadtong 200-meter individual medley, kon diin matud niya di niya paboritong langoy. Apan, iyang gipasalig nga ihatag gihapon niya ang tanan niyang mahimo sa maong tigi.
Ang pagka-overall championship nga kalampusan sa Pilpinas sa bag-o pang natapos nga 30th Southeast Asian (SEA) Games, matud niya, nagpakusog sa para athletes’ morale lakip na ang pag-asdang sa Asean Para Games.
Dugang pa niya, “Dagdag motivation.”
Iyang gipalit ang bahin sa iyang milyones nga cash incentives human sa Asian Para Games sa Jakarta, Indonesia niadtong miaging tuig og 920-square meter nga luna sa Igacos samtang ang uban naa sa bangko, iyang gi-time deposit.
Gipanganak si Gawilan nga way tiil ug di kompleto ang braso tungod sa epekto sa pildoras sa aborsiyon nga giinom sa iyang inahan sa iyang pagsabak.
Lima ka bulan pa lang siya sa dihang ang iyang inahan namatay tungod sa cholera samtang mga singko anyos pa pod siya sa dihang ang iyang amahan namatay tungod sa tuberculosis.
Samtang si Philippine Paralympic Committee (PPC) president Michael Barredo gikompirma niadtong niaging adlaw nga ang 10th Asean Paragames subling itakda tungod sa kakuwang sa pundo ug gikonsidera sab ang logistics, sumala sa pahayag sa Philippine Sports Commission (PSC) nga gihatag sab ngadto sa Sun.Star Davao.
Ang Para Games mao ang “twin event” sa SEA Games nga nitapos niadtong Disyembre 11.
Si Barredo, nga nakutloan og pamahayag sa PSC, nagsulti nga “While we have made every effort to prepare the Games in the past one and a half years, matters well beyond our control are compelling us to reschedule the event.”
Gitaho nga ang PPC nag-endosar sa bag-ong eskedyul ngadto sa Asean Para Sports Federation ug nihangyo sa PSC nga isulti sab ang mga katikaran ngadto sa laing Asean counterparts.