WAY nakitang foul play sa pagkamatay sa babaye nga natagak gikan sa ika-24 nga andana sa lawak sa condominium nga iya sa langyaw nga uyab alas 12:20 sa Sabado sa kaadlawon, Disyembre 21, 2019.
Si P/Executive Master Sergeant Antonio Din, imbestigador sa Mabolo Police Station, niingon nga base sa inisyal nga imbestigasyon, adunay duha ka mga construction worker nga anaa sa atbang sa building sa condominium sa dan Jose Maria del Mar, IT Park, Barangay Apas, Dakbayan sa Sugbo, nga nakasaksi sa pagkatagak ni Marlhane Castaños, 22, nag-abang og balay sa Sto. Niño Village, Brgy. Banilad, Cebu City.
Sigon ni Din nga ang estorya sa mga saksi, nakita nila sa glass nga bintana sa condo nga ang langyaw ug si Castaños nag-away.
Gani, gilambos ni Castaños ang iyang selpon.
Human niini, nigawas ang langyaw nga Taiwanese national sa kwarto ug gituohang nikanaog agi sa elevator.
Mga pipila ka mga minuto ang milabay, nakita sa mga saksi si Castaños nga nigawas nga wa nay sapot, nitungtong ug nilingkod sa aircon unit nga anaa sa ubos sa bintana.
Dugang ni Din nga misuway pa pagbadlong ang mga saksi kang Castaños apan “nibabay” kini nila.
Nisuway pa kini og kanaog sa pikas bintana, apan didto na naligas ang biktima ug natagak.
“Milingkod kuno nang biktima. Sa ilang tan-aw, mi ba bye pa kuno sa ilaha. Aksyon pa gani silag badlong. Karon miaksyon kunog kanaog ang biktima. Naligas ang tiil, natagak,” matod ni Din. Ang mga saksi nanawag dayon sa security sa building.
Nibalik sa condo unit ang langyaw ug sigon ni Din, suma pa sa mga saksi, nangita ang langyaw kang Castaños, apan wa na kini sa condo. Nikanaog sa ground floor ug nagpangutana hain na ang iyang uyab.
Dinhi na gisultihan ang langyaw nga dunay babayeng natagak sa building.
Nakaplagan sa mga construction worker si Castaños nga patay na ug nangabali ang kabukogan.
Gituohang puro hubog ang langyaw ug si Castaños, matod pa ni Din. “Gikan sila nag Christmas Party nya nakainom.”
NAKALITAN
Sa interbyu sa Superbalita Cebu sa inahan ni Castaños nga si Marie Victoria, 54, sa wa pa ang insidente, siya nanawag sa iyang anak mga alas 9 sa gabii, Biyernes, aron kumustahon kay dunay gitambungan nga party. Giingnan pa niya og “I love you, Nak. Amping, ayaw kalimot og ampo.”
Nakugang siya human masayod gikan sa mga pulis sa iyang pag-abot sa giabangan nilang balay gikan nisimba sa Misa de Gallo.
Sigon ni Marie Victoria nga niduol ang Taiwanese kaniya ug nangayo og pasaylo. Gipangutana niya kon nag-away sila ug niangkon nga galalis sila.
Gipakita niya sa inahan ang gamayng garas sa iyang pulsohan. Si Marlhane ang iyang bugtong anak. Sila lumad sa Iligan City.
Ang iyang anak naa na sa 2nd year college sa kursong Criminology, apan tungod sa hulga sa Marawi, siege nibalhin sila sa Sugbo.
Wa na kini motiwas pag-eskwela ug nitrabaho isip freelance tour guide. Nitugot sila nga i-autopsy ang lawas sa iyang anak sa Disyembre 27, apan wa siyay planong mokiha sa langyaw. /