NAPAKYAS sa pagsang-at sa ilang motion for intervention sa korte kagahapon ang mga lider sa Sitio Banawa ug Englis sa Barangay Guadalupe, dakbayan sa Sugbo aron ibasura ang temporary restraining order (TRO) nga gipakanaog sa korte niadtong milabayng semana.
Ang mga staff ni Regional Trial Court (RTC) Branch 58 Judge Gabriel Inglis naghuwat nga isang-at ang mosyon kagahapon apan naabot nalang ang alas singko sa hapon way nisang-at niini.
Gikatakdang husayon ni Inglis karong adlawa ang gisang-at nga petisyon ni Labangon Barangay Councilor Victor Buendia nga nag-awhag sa korte nga alang sa pagpakanaog sa writ of preliminary injunction.
Nunot sa petisyon ni Buendia napakyas ang pagpahigayn sa plebisito nga gikatakda niadtong Sabado.
Sa iyang bahin, si Kong. Antonio Cuenco, kinsa nangamahan sa balaod nga nagtakda sa plebisito aron umolon ang bag-ong barangay Banawa-Englis, namahayag nga ang mga molupyo sa Banawa-Englis modepensa sa gipresentar nga punto ni Buendia nga makahimog “irreparable damage” kon napahigayon ang plebisito niadtong Sabado.
Gihulagway ni Cuenco nga “speculative” kini kay di pa man seguro kon “yes” ba ang motumaw nga resulta sa naasoyng kalihokan ug ang bag-ong barangay nga lakip niini ang Rosalina Village ang maumol.
Iyang gitumbok nga ang balaod nga nagtakda sa plebisito aron maumol ang Barangay Banawa-Englis gikonsiderar kini nga insakto. (JECT)