USA ka semana ang milabay human sa surprise drug test sa mga fire volunteer sa 29 ka mga barangay sa Dakbayan sa Sugbo atol sa ilang Christmas Party sa covered court sa Barangay Tinago niadtong miaging Biyernes, Disyembre 13, nigawas nga dunay unom sa 200 ka fire volunteers ang positibo sa drug test.
Ang drug test gipasiugdahan sa Cebu Office for Substance Abuse Prevention (COSAP)
.
Bisan kon positibo sa drug test ang unom, ang hukom sa pagpadayon nila pagserbisyo og pagtubag og mga alarma sa sunog naa sa mga barangay kapitan.
Ang pangu sa mga fire volunteer, Kelly Quijada, konsehal sa Barangay Capitol Site, nasagmuyo sa resulta tungod kay wa siya magdahom nga duna diay tigamitan og drugs sa fire volunteers.
Apan si Quijada nagpasalamat gihapon sa resulta tungod kay nahibaw-an nga duna diay drug users samtang sayo pa.
Matod ni Quijada nga ilang taktakon ang mga volunteer nga positibo sa drugs sugod sa Enero 1.
Apan iyang gipasabot nga bisan kon ilang taktakon, naa ra sa hingtungdang mga barangay kon ila pa kining patubagon og mga alarma.
“Kon ang kapitan ang modesisyon nga dili sila taktakon, wala nami mahimo. Ang kapitan na ang manubag gyud ana,” matod ni Quijada.
Samtang kadtong wa makaapil sa drug test sa ilang Christmas party, di usab luwas kay kinahanglan silang magpa drug test.
Samtang ang officer-In-charge sa City Disaster Risk Reduction Management Office (CDRRMO), Harold Alcontin human mapahibawo sa resulta, nagpasalamat nga unom lang sa dul-an 200 ka mga fire volunteer ang nagpositibo.
Matod pa ni Alcontin nga di sila mo-tolerate sa ilang sakop nga drug user, ila kining taktakon.
Wa siya makakitag rason nga mogamit og drugs ang volunteer. / BBT