NAKA standby na hangtod sa Pasko ang buhatan sa Provincial Disaster Risk Reduction and Management Office (PDRRMO) alang sa Pasko.
Bisan kon posibleng di kusog ang hangin, ang ilang gipangandaman mao ang uwan base sa mga kasinatian sa nangaging katuigan sa samang buwan.
Gibutyag ni Rhee Telen Jr., sa PDRRMO nga andam na usab ang mga ambulansya sa Provincial Health Office (PHO).
Lakip sa gipangandaman sa PDRRMO ang low pressure area ug posibleng mga panghitabo panahon sa Pasko.
“Naa na gyud mi dinhi tanan. Diri na mi mag Pasko. Mag shift ra siguro mi... We can assure nga naa ra gihapon mi sa PDRRMO for the next days bisag holidays in preparation for the LPA ang sa duha,” matod ni Telen.
Giabisohan usab sa buhatan ang mga Sugbuanon nga namuyo sa lupa nga mga dapit nga manawag sa Local Disaster Risk Reduction and Management Office (LDRRMO) alang sa hinanali nga pagsusi ug pag responde ilabi na panahon kon mohumok ug may masinati nga pag dahili sa yuta.
“We are preparing kay sa previous years nga atong nasinati even with Senyang and Crising, ang pag ulan gyud ang nagdala og kadaot ug death and casualties so let’s stress about the rains, reminders gihapon nato sa mga namuyo sa mga high risks areas both sa low lying sa mga landslide prone areas nga mag bantay mag matngon,” matod ni Telen./ ANV