GUSTO ni Gobernador Gwendolyn Garcia nga dumalahon sa Provincial Traffic Management Board (PTMB) ang nasudnong mga highway. Apan matod sa Department of Interior and Local Government (DILG) nga ang pagdumala sa trapiko sa national highway naa sa mga local government unit (LGU).
Mao ni ang gihimo karon sa kalungsoran ug mga siyudad sa lalawigan sa Sugbo. Apan ang kahimtang sa trapiko wa molambo, hinunoa nagkagrabe. Ang labing dali nga solusyon aron maluagan gamay ang kahimtang sa trapiko mao ang higpit nga pagdisiplina sa mga drayber ug pedestrian.
Sa Metro Cebu, diin nagdasok ang daghang mga tawo, bisan asa lang mohunong ug moliko ang mga sakyanan bisan ang portion sa karsada dunay no left turn ug no u turn sign. Bisan klaro kaayo nga dunay signage nga no parking ug no stopping, gihimo nanghunong ang mga drayber.
Duna bay nibadlong o nidakop kanila? Wala. Ngano man? Hayan ang traffic enforcer gustong mopatuman sa balaud sa trapiko, apan ang local chief executive officer magpanuko tungod sa political pressure.
Bisan gani sa Cebu City, daghang traffic signs ang wa tumana sa mga drayber. Igo rang tan-awon sa mga traffic enforcer sa Cebu City Transportation Office (CCTO) ang violators. Mas ganahan silang manakop sa mga sakyanan nga nag-park sa secondary nga mga dan kay kuno obstruction. Naa hinuoy klarong violations, tan-awon rang mga nakalapas.
Ang pagdisiplina sa mga drayber ug pedestrians maoy labing dali nga solusyon sa suliran. Di makasulbad sa hingpit apan makapaluag og gamay. Gikinahanglan usab ang pagbansay sa mga enforcer sa mga eksperto sa pagdumala sa trapiko.
Kini epektibo kaayo kon ubanan sa political will sa kadagkuan sa mga LGU. Hangtod nga way hugtanay nga pagpatuman sa balaud, magpabilin nga way kasulbaran ang suliran.