MADRID, Spain- Panaghiusa sa mga nasud maoy gipanawagan sa Executive Secretary sa United Nations (UN) Climate Change aron makab-ot ug mahimo niini ang mga saad ubos sa Paris Agreement ug UN Framework Convention on Climate Change (UNFCCC).
Ang panawagan ni Patricia Espinosa nigawas kapin usa ka semana human sa pagtapos sa ika-25 nga hugna sa UN Climate Change Conference nga mas nailhan nga COP (Conference of Parties) nga gipahigayon sa Madrid, Spain gikan Disyembre 2 hangtod 13.
Sa maong conference, gihisgutan niini ang mga lakang og posibleng solusyon aron matuman ang mga lagda ubos sa Article 6 sa 2015 Paris Agreement aron kabatukan ang epekto sa isyu sa climate change.
Apan pakyas ang COP25 sa paggama og “rulebook” kalabot sa Paris Agreement, sa “carbon market” ug ubang porma sa internasyunal nga kooperasyon ubos sa Article 6.
“We need to be clear that the conference did not result in agreement on the guidelines for a much- needed carbon market – an essential part of the toolkit to raise ambition that can harness the potential of the private sector and generate finance for adaptation,” ni Espinosa sa iyang statement.
Dugang niya nga gikinahanglan pa sab nga tubagon sa mga developed countries ang panawagan sa mga developing countries alang sa suportang pinansyal ilabi na sa teknolohiya aron makab-ot niini ang “green economy.”
Paambit ni Espinosa nga wa sab nipadayag og igong sinyas ang mga nasud nga taas og carbon emission sa pagpalambo sa ilang istratehiya aron matuman ilang ambisyon nga kinahanglan nilang isumiter pinaagi sa Nationally Determined Contributions (NDCs) sunod tuig.
Sa iyang bahin, wa sab nakauyon si UN Secretary General António Guterres sa resulta sa COP25.
“I am disappointed with the results of #COP25. The international community lost an important opportunity to show increased ambition on mitigation, adaptation & finance to tackle the climate crisis. But we must not give up, and I will not give up,”sigon ni Guterres sa iyang tweet niadtong Disyembre 15.
Dugang ni Guterres nga mas determinido siyang motrabaho sunod tuig diin nikomiter ang mga nasud sa paghimo og lakang aron makab-ot niini ang carbon neutrality sa tuig 2050 ug kalikayan ang pagtaas sa temperatura ngadto sa 1.5 degrees Celsius.
Dismayado sab si Sonam P. Wangdi, chairman sa Least Developed Countries (LDC) Group sa resulta sa COP25.
“We must see countries enhance their NDCs next year in line with 1.5 degrees Celsius pathways and their fair share. And we must see delivery of the 100 billion US dollars of climate finance promised,” ni Wangdi sa iyang statement.
Gitawag usab ni May Boeve, executive director sa grupong 350.org ang COP 25 nga kalampusan sa fossil fuel industry.
“As time ran out, the COP looked more and more like a hostage situation inside a burning building- together with most negotiators, people and planet were held captive. As the fossil industry and few loud governments who have been delivering on their agenda took over the process,” sigon ni Boeve.
“I think they need to change their way a bit when taking decisions because this one doesn’t work very well and I think we young people need more true space and not only a fake one,” ni Federica Gasbarro, 24 anyos ug youth climate activist sa grupong Fridays For Future sa Italy sa dihang nahinabi sa Superbalita Cebu.
Nalangay halos 2 ka adlaw sa gikatakdang schedule ang pagtapos sa COP ning tuiga nga gitambungan sa kapin 25 mil ka mga deligado, kini gikonsiderar nga maoy pinakadugay sa kasaysayan sa maong tinuig nga panagtagbo.
Ang sunod hugna sa COP gikatakdang himuon sa Glasgow, Scotland sunod tuig. (Superbalita Cebu)