MISMONG ang overseer sa City Economic Enterprises Department (CEED) ang namadlong sa mga vendor nga padayong namaligya bisan og wala na sa oras nga gitugot sa lokal nga kagamhanan sa dakbayan sa Cagayan de Oro.
Gibutyag ni Konsehal Ian Mark Nacaya, overseer sa CEED nga dili na niini buot nga mausab pa ang nahitabo nga karambola sa Cogon tali sa mga personahe sa Roads and Traffic Administration (RTA) ug sa mga vendors rason nga kini una ang gabadlong apan ang dili mopatoo hakuton na ang ilang mga paninda.
"Nanginabuhi man ni sila pero dili pud lugar nato gusto nga dili plastado ang tanan, katong nahitabo katong miaging adlaw nagsinumbaga ang mga RTA ug mga vendors di na nato gusto mahitabo dinhi mao na kita nalang nag una," matud ni Nacaya.
Gibutyag pa ni Nacaya nga gitugotan niini ang pagpamaligya basta dili latag aron nga makaparada ang mga sakyanan ug gamay lang nga espasiyo ang magamit aron usab makaagi ang katawhan.
Gidugang pa niini nga duna nay mga negosyante ang nagreklamo human nawad-an og mga kliyente gumikan na usab kay maglisod na sa pag-agi ug bisan sa pagparada rason nga naghangyo kini nga angay-angay lang ngadto sa mga vendors.
"Angay-angay man ni ato, protektado man mo panahon sa gabii wala may gapanghilabot ninyo, sauna sige ra gukod, gihataagan naman mo og pabor hatagan sad nato og pabor ang uban," dugang niini.
"Patas lang gyud nga panerbisyo mao raman gyud ato," dugang pa.
Samtang naghangyo usab ang presidente sa Capt. Vicente Roa vendors association nga si Sultan Jabbar Linog nga unta sabton sab sa mga dagkong establisimento sila nga mga vendors kay pila lang man usab ka adlaw ug balik na sa normal human sa Pasko.
"Kung po-pwedi sana yung mga establisimento kung hindi naman masyadong nakaka-istobro," pahayag ni Linog.
"Kaya nga nakikiusap kami na mapagbigyan nyo kami ng mabuhay namin ang mga pamilya namin dahil itong mga ginagawa namin ay para din ito sa mga anak namin na makapag-aral," dugang pa.