ANDAM na ang Davao City Transport and Traffic Management Office (CTTMO) sa paggiya sa posibleng paghuot sa dagan sa trapiko karong adlaw sa Pasko ug Bag-ong Tuig.
Kini ang gibutyag ni CTTMO chief Dionesio Abude dihang nahitsas ang ilang plano sa kung kinsa ug pila ka mga personahe ang ilang ibutang sa dapit.
“Nahitsas na ug andam na kita sa volume sa traffic karong Pasko ug New Year,” butyag ni Abude.
Giingon hinuon sa opisyal nga bastante ang ihap sa mga personahe sa CTTMO ug walay angay nga kabalak-an sa pagkulang sa maggiya.
“Naa man gyud tay mga personahe, okay man ang gidaghanon ang atoa lang gyud niini ang kooperasyon sa mga motorista,” dugang ni Abude.
Gilauman nga huot ang dagan sa trapiko sa palengke sa Bankerohan ug Agdao, lakip na ang paghuot sa trapiko sa Jose P. Laurel Avenue (Bajada) gumikan sa mga dagkong mall sa dapit.
Nipahimangno sab ang opisyal nga dili magpataka og parking ang dunay mga sakyanan aron dili sab makadugang sa kaguot sa dagan sa trapiko.