MARAGUSAN, Davao de Oro -- Aduna nay mga persons of interest ang kapulisan sa Maragusan Municipal Police Station sa pagpatay sa 13-anyos nga estudyante kinsa napalgang patay daplin sa kalsada sa Dole Banana Plantation sa Purok Palmera, Barangay New Katipunan, Maragusan, Davao de Oro niadtong Huwebes, Disyembre 19.
Kini ang gibutyag sa Maragusan MPS apan dili una nila mapanganlan sa publiko sanglit padayon ang ilang gihimong imbestigasyon sa panghitabo.
Giila ang biktima nga si Leni Hoylar, 13, Grade 8 student sa Maragusan National High School ug residente sa GK Village, Barangay New Katipunan, Maragusan, Comval.
Sa social media posts sa mga higala ug classmate ni Leni, nanawagan sila og hustisya sanglit buotan kaayo ang biktima.
Padayon sab ang pagbangotan sa mga kabanay sa biktima diin ang inahan niini gusto sab nga makabsan og kinabuhi ang posibleng suspek kung masikop kini.
Matud sa inahan sa biktima nga alas 7 sa gabii niadtong Miyerkules, Disyembre 18, nakuyawan na sila dihang wala na kauli ang biktima sa ilang balay.
Alas 11 sa buntag pagkaugma, napalgan na lang ang patay nga lawas sa biktima nga nagbuy-od sa kasagbutan kilid sa kalsada sa nahisgutang barangay.
Ang biktima nagkadugo diin adunay mga dinukdukan sa bato sa ulo nga maoy hinungdan sa iyang hinanaling kamatayon.