MAGSAYSAY, Davao del Sur -- Aron malatas ang kalisod ug matabangan ang mga biktima sa linog, mitanyag na og “cash for work program” ang gobyerno.
Pipila na ka mga biktima sa unang tulo ka linog niadtong Oktubre ang namalik na sa ilang panginabuhian.
Nanghatag na sab ang Department of Social Welfare and Development (DSWD) og mga food packs alang sa mga biktima ning lugar niadtong Biyernes.
Kapin 5,000 ka mga apektadong pamilya ang nakadawat sa maong hinabang.
Sukad nahitabo ang kusog nga linog niadtong Oktubre, naundang sa pagpanuroy og gulay ang 52-anyos nga si Ofelia ug hangtud karon nagsalig na lang siya sa mga hinabang gikan sa gobyerno ug ubang ahensya.
Nasayran nga nagsugod na pagdawat og mga aplikante ang Department of Labor and Employment alang sa Special Employment Program.
Mokabat na sa 1,200 ka mga indibidwal ang nakadawat og tag P3,000 ngadto sa P5,200 nga kwarta isip suhol sa 10-15 ka adlaw nga cash for work.
Sumala ni Leonile Escarpe, Public Employment Service Office manager sa lugar, nga gipalimpyo sa palibot, motaod og mga tent ang mga nadawat nga trabahante bugti sa ilang sweldo.
Sa kasamtangan, laing 6,000 ka mga benepisyaryo ang makapahimulos sa programa.
Nalipay sab ang mga nadawat sa programa sanglit makapalit na sila og mga lansang ug uban pang materyales aron hinay-hinay nga makatukod og balay.
Ang ubang biktima nagsugod na pagpabaligya og ginagmay’ng negosyo sama sa saging maruya ni Teresa Plaza, kay di na sila buot nga magsalig lang sa hinabang.