FRED FUENTES MONTERNEL
Lorega Proper, Cebu City
GIKAN sa kinaubsang patag maoy nasawod sa pandungog ni Binog ang mga paskuhanong awit nga gitugtog sa mga radyo ug esteryo sa kabalayan sa mga molupyo sa ilang baryo sa Bagtik. Hinay nga mitimbakuwas si Binog sa gihigdaan niyang kama sulod sa kuwarto ning karaang balay nga gama sa lubasang kahoy nga natukod dinhi sa nabungtod nga dapit sa baryo.
“Pasko na sab!” tuaw ni Binog nga mikanaog sa natad ug naghimas-himas sa iyang braso ning sayong kabuntagon. Unya nabatyagan niya ang pagtapdas sa buntagong huyuhoy sa iyang kalawasan.
“Kaanindot sa huyuhoy sa Pasko!” mikitabkitab ang baba ni Binog samtang naglantaw sa kinaubsang patag, lahos na sa iyang umahan nga gipasaupan na lang niya sa kasaligang mga tawo. Modawat na lamang siya sa abot ug halin sa tanang produkto sa lima ka ektaryang patag nga umahan.
Hayahay ang kahimtang ni Binog, apan nagpabilin siyang ulitawong gulang sa edad nga sitinta nga may mga uban na sa ulo. Apan abtik ug tuyhad pa kaayo ang pamayhon ni Binog. Lagsik pa ang iyang linihukan nga kon siyay pasultihon, mora lang kuno siyag singkuwenta anyos ang pangedaron. Bugtong siyang anak sa mag-uumang ginikanan nga sa buhi pa nagdasig kaniya kaniadto sa pagminyo. Apan mitaliwan na lang sa laing kalibutan ang iyang ginikanan, si Binog wa pa gayud makahunahuna pagminyo hangtod karon nga edaran na siya. Tingali, tungod kay natagbaw si Binog kanhi sa mga babayeng binayran ang kalipay matag suroy niya sa siyudad.
Daghang mga babaye nga nakagusto kaniya sa ilang baryo, apan way usa nga giulitawhan si Binog.
“Noy Binog! Noy Binog! Ania na ang pamahaw nimo! Di ko gustong mapasaran kas gutom. Pasko na ra ba!” sangpit sa usa ka babaye.
Nahalingi si Binog. Maoy misugat sa iyang panan-aw si Lita nga bag-o lang nahatungas nga nagbitbit og basket nga gisudlan sa dalang pagkaon. Si Lita, biyuda, kanhi asawa sa sinaligang saop ni Binog nga si Tekyo nga dugay nang namatay kay giatake sa hayblad. Singkuwenta anyos na si Lita nga maoy gitahasan ni Binog pag-monitor sa upat niya ka saop. Bisan niadtong buhi pa si Tekyo, si Lita na ang nagpakabana sa pamahaw, paniudto ug panihapon ni Binog. Wala tugahi og anak si Lita sa namatay niyang bana kay baog si Tekyo. Si Lita sab ang manglaba sa mga sinina ni Binog ug pag-utaw niini. Ug matag Pasko hatagan ni Binog si Lita og espisyal nga pinaskuhan: mga desenteng sinina ug P10,000 nga bonus. Nagtumpi ang kuwartang iyang tinipigan, mga papel de banko sulod sa iyang karaang kaban nga nanimahong tangkob.
Nagpahiyom si Binog nga miduol kang Lita nga nagbitbit sa basket.
“Gusto ko nga saluhan mo ako sa pamahaw sa kusina, Lit. Salamat gyud kaayo sa way hunong mong pag-amuma nako gikan pa sa sinugdanan!”
“Dugay ko nang giisip nga ikaw maoy puli kang anhing Tekyo, Noy Binog!” ni Lita nga mitutok kang Binog nga salabtunon.
Nahimuot si Binog sa nabati niyang mga pulong ni Lita. Ning Paskuha nakahuhom na siya nga daygan si Lita sa iyang gibati nga gugma. Pakaslan niya si Lita, kay karon pa siya makabatyag og gugma sa biyuda. Oo, may ikabuga pa siya sa romansa ug imatuod niya kini kang Lita. Nasayod sab siya nga dugay na nga may pagbati kaniya ang biyuda.
Nabatyagan na usab ni Binog ang pagsapigad sa siaw nga huyuhoy sa Pasko ning buntaga samtang nagtinutokay ug nagpahiyumay silang duha si Lita. Gigunitan ni Binog ang usa ka bukton ni Lita ug nanaka sila sa itaas paingon sa kusina. (KATAPUSAN)