DI NA gyud kapugngan, duha ka adlaw nalang ang paabuton Pasko na! Kumusta man? Mosugot ta ug sa dili mahinayon man gyud ang Pasko. Andam na ba mo? Di ikalimod nga luyo sa kasadya sa palibot nga maoy naandan ning panahon sa Pasko, dunay daghang kasingkasing ang magul-anon. Nag-unang hinungdan kay may mga minahal sa kinabuhi ang nitaliwan sa laing kalibutan.
Ang laing rason kay may nagmasakiton ug naa pa sa tambalanan nagpaalim sa ilang balatian. May mga pamilya nga masulob-on kay ang amahan o inahan nagtrabaho sa abroad ug di pa makapauli. Ang mga binilanggo kutob nalang sa paghandum niadtong panahon nga gawasnon pa sila. Karon nagpaabot nga ilang ikauban ang ilang pamilya sud sa bilanggoan.
Ang laing hinungdan bag-o lang naigo og katalagman sama sa linog nga niigo didto sa Mindanao. Ang sunog nga niigo sa Sitio Lourdes sa Barangay Inayawan, Cebu City niadtong Beyernes sa hapon. Ang maong sunog nilamoy og di mominos 50 ka panimalay ug nakapa apiki sa 70 ka pamilya.
Sa evacuation center maabtan og Pasko ang mga biktima. Taliwala sa ka apiki sa pangwarta karon wa gyud tawon magdahom ang mga nasunogan nga mawad-an sila sa ilang mga panimay ning panahon sa Pasko. Luoy kaayo ilabi na sa mga bata nga mao unta ang sentro sa selebrasyon sa Pasko. Kita nga nakasabot sa ilang sitwasyon mahimo kaayo nga mogahin og panahon ug salapi nga bisan sa ginagmay nga paagi makapaambit aron sila malipay. Sayon rang tultulon ang evacuation center. Pakig-alayon lang sa barangay. Sa mga nasunogan di mo magpawa sa paglaum.
Atong i-ampo nga bisan ning panahon sa tingbakasyon ang gobyerno mopadayon sa pag-alagad sa inyong inadlaw nga panginahanglan. Labaw sa tanan mapadali ang inyong pagbangon sama sa mga materyales nga gikinahanglan aron mobalik og barug ang naabo ninyong panimay. Nindot panaminan natong tanan ang ilang sitwasyon. Ilabi na ning panahon sa Pasko. Hagit sab ni sa mga ahensiya sa gobyerno pagtinuod sa ilang gipanumpaan nga katungdanan. Ang Pasko para sa tanan. Kabus ug adunahan samot na gyud sa mga biktima sa katalagman.
***
Mga pahalipay sa tanan nga magtukaw sa pagsugat sa Pasko. Mga sundalo, pulis, bombero, doktor, midwife, pharmacist, rescuer, traffic enforcer, taxi ug PUJ driver, driver sa ambulansiya, mga trabahante sa hotel, restawran, reporters, kapitan ug tripulante sa barko, ug ang uban pa natong kaigsuonan.