GIBUTANG sa Department of Health (DOH) 7 ubos sa Code White ang tanang pampublikong tambalanan sa rehiyon sugod niadtong Sabado, Disyembre 21, 2019 isip pagpangandam sa mabuthan sa firecrackers sa umaabot nga Pasko ug Bag-ong Tuig.
Si Dr. Shelbay Blanco, pangulo sa Health Emergency Management Service (HEMS) sa DOH 7, niingon nga ubos sa Code White, ang mga hospital personnel andam sa tanang higayon nga moatiman sa trauma cases, ilabi na sa mga firework-related injuries.
Ang DOH adunay “Iwas Paputok Campaign” aron malikayan ang mga firework-related injuries. Kon magmalampuson kini, wa nay magpabuto og mga rebentador ug wa nay kabalak-an ang trauma teams sa mga pampublikong hospital.
***
Ang kustombre sa pagpabuto sa mga dagkong okasyon atong nasunod gikan sa China. Sa unang panahon, ang tibuok kawayan maoy dauban aron mobuto. Hangtod nga nadiskubrehan ang black powder, ang pulbora nga mao na karon ang gigamit sa firecrackers.
Sa ikapitong siglo didto sa China, gigamit ang mga pabuto aron pag-abog sa mga dautang espiritu sa pagsugod sa Bag-ong Tuig. Dinhi sa ato, gigamit ang mga pabuto di lang sa Bag-ong Tuig, kon di bisan sa Pasko.
Gikan sa pag-abog sa mga dautang espiritu, gigamit na kini sa paglingaw-lingaw. Mas sipa ang pabuto, mas alegre. Pero sagad nga moresulta kini sa lain-laing injuries sama sa maputol ang mga tudlo ug duna pay mabuta. Imbis alegre, disgrasya na hinuon.
***
Si Dr. Blanco niingon nga naglaum sila nga mokunhod ang mga tawo, ilabi na sa kabataan, nga mabuthan karong umaabot nga Pasko ug pagsugat sa Bag-ong Tuig. Sa miaging tuig, niabot sa 67 ang nabuthan, mas taas kay sa 54 ka kaso sa 2018.
Nag-una ang Sugbo sa gidaghanon sa mga nabuthan sa firecrackers sa Central Visayas. Hangtod sa Enero 2019, 53 ka kaso sa injury ang natala sa Sugbo, upat niini ang nabuthan nga naputlan og parte sa lawas, 39 ang nabuthan lang, pito ang naigo ang mata ug tulo ang naigo sa saag nga bala.