KAPIN sa P500,000 ang balor nga shabu ug 16 ka mga tawo ang nadakpan sa manalahing buy bust sa kapulisan sa dakbayan sa Sugbo ug dakbayan sa Talisay.
CEBU CITY
Niadtong Sabado sa udto, Disyembre 21, duha ang nadakpan sa mga operatiba sa Drug Enforcement Unit (DEU) sa Parian Police Station sa Barangay San Antonio.
Ang operasyon pinangulohan ni PMaj. Armando Labora, hepe sa Station 1, Parian Police nga miresulta sa pagkasikop kang Cecille Albaña, 25, samtang oras lang ang milabay nadakpan usab si Marilyn Gamboa, 45, pulos molupyo sa dan V. Rama sa sa Barangay Calamba.
Atol sa gihimong buy bust sa duha ka mga dinakpan, moabot sa P170 ang nasakmit nga mga shabu subay sa iyang Drug Dangerous Board (DDB) value.
Sila si Albaña ug Gamboa miangkon hinuon nga namaligya sila og shabu tungod kay nahunong ang ilang trabaho.
Samtang pagka Dominggo, Disyembre 22, pasado alas 12 sa kaadlawon, laing pagpang ronda sa San Nicolas Police Station 6.
Si PMaj.Kenneth Paul Albotra, hepe sa San Nicolas Police, kuyog sa maong buy bust uban sa ma sakop sa DEU ug laing duha ang nasikop.
Giila ni Albotra ang una nga nadakpan nga si Ahron John Subingsubing, 18, ug molopyo sa Sityo Acacia, Barangay Duljo Fatima.
Nasakmit kang Subingsubing nga shabu ang moabot na sa P204 mil ang balor sa shabu subay sa iyang DDB value.
Nasuta sa midakop kang Subingsubing nga duna kini nag ung-ong nga kasong murder human mapatay niini ang ilang silingan nga si Jonathan Mejares kinsa matod pa sa suspek nga usa ka kawatan.
Ang insidente nahitabo sa Barangay Duljo Fatima human nga ang suspek gikan sa usa ka inom sa usa ka kalingawan sa Barangay Tisa atol sa pagsaulog sa kapiyestahan sa ilang barangay.
Ang suspek diha na miangkon atol sa pagkadakop kaniya sa gihimong buy bust operation sa mga operatiba.
Upat ka oras ang milabay laing suspek ang nadakpan sasumang mga operatiba human gipatuman ang laing buy bust operation.
Giila ang nadakpan nga si Marjane Quitara, 30, taga Sityo Indian, Barangay T. Padilla, kanhi pharmacy assistant.
Nasakmit gikan kang Quitara ang mga shabu nga mobalor sa P340 mil nga balor subay sa iyang DDB value.
Matod ni Albotra nga ang kapuyo ni Quitara nga napriso na sulod sa Cebu City Jail, ang kontak niini.
Ang dinakpan matod pa nga nisulod kini sa pag-dispose og mga shabu human nga mawad-an og trabaho niadtong Oktubre ning tuiga.
Sila si Subingsubing ug Quitara gihulagway nga city level high value target. Sa Barangay Pasil, nadakpan si Subingsubing samtang si Quitara sa Barangay Pahina San Nicolas.
TALISAY CITY
Mas gihingusgan karon sa Talisay Police diha sa mga batan-on ang kampanya batok sa ilegal nga drugas human nga tulo sa 14 ka Talisaynon nga nadakpan sa bag-uhay nga buy bust sa Barangay Tabunok, mga menor de edad.
Gani usa sa tulo ka menor de edad ang target pa sa Talisay City Police Station, diha sa Mananga 2 sa Tabunok, atol sa duha ka sunod-sunod nga buy bust, Sabado sa gabii, Disyembre 21.
Unang nasikop ang 16 anyos nga taga Barangay Lagtang, siyudad sa Talisay, kinsa maoy subject sa operasyon alas 9:45 sa gabii, ang maong batan-on ang anaa na sa drug watchlist sa TCPS. Gihulagway kini nga usa ka street level target.
Lakip sa nasikop sa unang operasyon ang usa ka 15 anyos nga lalake nga taga sitio Molave, Tabunok.
Nasikop usab sila Johnny Paran, 24, taga lungsod sa Minglanilla; Arnildo Bautista Villarino, 53, taga Inayagan, Naga City; Niel Naling, 22, taga Bacay, Minglanilla; Steph Claude Bayabos, 23, taga Lawaan 1 sa Talisay; ug Jonathan Manatad Pepito, 46, taga Barangay Tuyan, Naga City.
Ang kapulisan ang nipaubos sa subject og usa ka semana nga surveillance human makadawat og taho, nga usa kini sa mga hinungdan sa lantaran gihapon nga pagpamaligya og drugas sa Mananga.
Hinungdan nga gipahigayon ang operasyon ug niresulta sa pagkasikop niini uban ang laing unom, kinsa gipang-ila pa kon kauban ba nga namaligya o mga manggamitay kini sa shabu.
Nasakmit sa kapulisan gikan sa pito ang usa ka medium pack ug 58 ka gagmay nga pinakete sa gidudahan nga shabu nga gibana-banang mobalor og dul-an P40 mil.
Samatang alas 11:55 sa susama nga adlaw ug lugar, laing pito na usab ang nadakpan tungod gihapon sa pagkalambigit sa ginadili nga drugas.
Nangadakpan sila si Janrey Ebrado, 19, molupyo ra sa Mananga 2, barangay Tabunok, kinsa subject sa operasyon, laing 16 anyos usab ang nasikop nga taga barangay Bulacao.
Nasikop pa sila Joeffre Larawan, 43, seaman; Florencio Mañego, 25; Jerick Sabinico Pardillo, 38; Jake Michael Gomez, 20; ug Jemark Alcontin, 27.
Nakuha gikan kanila ang usa ka medium pack ug 41 ka gagmay nga pinakete sa shabu. Gibana-banang mobalor kini sa kapin P27 mil.
Matod ni Major Gerard Ace Pelare, hepe sa TCPS, pipila pa gyud ang ilang madawat nga report kalabot sa mga mamaligyaay ug diha na usab manggamit sa ginadili nga drugas sa Mananga sa Tabunok.
Hinungdan nga mas subsob pa nga anti-drug operations ang ilang gihimo uban na usab ang pagduaw sa komunidad paghangyo sa mga molupyo nga makig-alayon sa kapulisan aron sa hingpit nga pagpuhag sa ginadili nga drugas sa lugar.
Kini ilabi na nga nigara kining mga batan-on nga mao nay nangunay sa pagpamaligya. (B)