Signal no. 2 sa Sugbo atol sa Pasko: Pagasa

ULAN PA MORE: Ingon gyud ini ang talan-awon kon magbunok ang uwan diin ang mga motorista maglisod sa paglatas sa dalan sa dakbayan sa mga dapit nga bahaan, sama ning hulagway atol sa miaging bagyong 'Tisoy' sa dakbayan sa Sugbo. (Alex Badayos)
ULAN PA MORE: Ingon gyud ini ang talan-awon kon magbunok ang uwan diin ang mga motorista maglisod sa paglatas sa dalan sa dakbayan sa mga dapit nga bahaan, sama ning hulagway atol sa miaging bagyong 'Tisoy' sa dakbayan sa Sugbo. (Alex Badayos)

KON gaplano mo og party karong Pasko, mas maayo nga indoor na lang kini ninyo buhaton.

Nipahimangno ang Philippine Atmospheric, Geophysical and Astronomical Services Administration (Pagasa) nga posibleng ipaubos sa Storm Signal No. 2 ang Sugbo sa adlawng Pasko mismo, Disyembre 25.

Matod ni Pagasa Visayas officer-in-charge (OIC) Engr. Al Quiblat nga mosulod sa Philippine Area of Responsibility ang Bagyong Ursula, sa tungang gabii o sayo sa buntag sa Lunes, Disyembre 23.

Posible usab nga sa Tropical Cyclone Advisory# 3 sa Pagasa karong alas 11 sa buntag, ipaubos na ang Sugbo sa Tropical Wind Storm Signal No. 1.

Sa uwahing update sa Pagasa sa Bagyong Ursula nga aduna’y international name nga “Phanfone” kagahapon sa alas 11 sa buntag, nasigpatan kini mga 1,365 kilometros sa Sidlakan sa Mindanao.

Matod ni Quiblat, may gilapdon nga 600 kilometros ug kon dili mausab ang dagan niini nga 25 kilometros matag takna, mo-landfall kini sa Northern Cebu karong Pasko, Disyembre 25.

Parehong gadala kini og hangin ug uwan hinungdan nga sa dili pa kini mo-landfall sa Samar o Leyte, makasinati na og bati nga panahon ang Kabisay-an.

Malaumon hinuon ang Pagasa nga paspas ra ang dagan niini aron dili kaayo lapad og kadaot ang ibilin niini.

Gikan sa kasamtangan nga kategoriya niini nga Tropical Storm, mosaka kini sa Severe Tropical Storm diin magdala kini og 62-118 kilometros matag takna nga hangin, duol na kini sa Typhoon Category.

Sa Disyembre 26, mobalik na ang maayo nga panahon sa Visayas apan sa Disyembre 27 pa kini mogawas sa PAR. (B)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph