Kidnapper sikop

IPRESENTAR karong Lunes, Disyembre 23, sa Police Regional Office (PRO) 7 ang mini nga kidnapper tungod sa iyang managlahi nga Facebook account niini ug nasikop didto sa Maco (kanhi Compostela Valley) niadtong Sabado, Disyembre 22.

Si Jade Angulo Sabroso, 32, taga Barangay Lapu-lapu, lungsod sa Maco, Davao de Oro, na-entrap sa Smart Padala sa remittance center niadtong Sabado sa alas 5:00 sa hapon sa Tagum City human mokuha na unta kini sa 'ransom money.'

Kidnapping?

Si Police Executive Master Sgt. Zosimo Ravanes, Jr. sa Anti-Kidnapping Group (AKG-7) Visayas Field Units ug mga counterpart sa Mindanao Field Units maoy nisikop kang Sabroso, human sa ikaduhang binayranay sa giingong ransom.

Matod ni Rabanes sa Superbalita Cebu nga na-missing ang 18 anyos nga dalaga nga taga lungsod sa Sogod, Sugbo niadtong Lunes sa gabii, Disyembre 16, human mananghid sa iyang ginikanan nga molaag sa iyang classmate nga nagpuyo sa Cordova, Cebu.

Ang inahan niini nga dunay mga tinda ug ang bana niya usa ka chief security, ni-report sa kapulisan pagka-Miyerkules, Disyembre 18, nangayo og abag sa AKG-7 VF.

Si Rabanes niingon nga ang mga ginikanan mikontak sa selpon sa ilang anak niadtong Lunes sa gabii hangtud sa Martes, apan dili na makontak.

Tungod sa ilang kabalaka, gi-post nila sa Facebook ang pagkahanaw sa ilang anak.

Dinhi nisakay ang suspek nga si Sabroso, usa ka mahuyang. Migamit kini og tulo ka account sa Facebook ug ni-communicate niadtong Miyerkules sa gabii ug midemanda og P50 mil nga ransom money.

“Sa mensahe niya sa Messenger, mi-demand ang suspek og 50K kay kun dili amo ni patyon inyo anak o ibaligya ni namo sa lain,” dugang ni Rabanes.

Ang mga ginikanan nabalaka nga dunay mahitabo sa ilang anak mihangyo kini nga 5K lang una ilang unang ipadala kay mangita pa sila og kwarta.

Wala pa gyud gipakita sa suspek o gipaestorya ang ilang anak.

Apan ang mga sakop sa AKG7 Visayas field units paspas nga misuhid ngadto sa dakbayan sa Lapu-Lapu ug didto sa lungsod sa Cordova, sa classmate niini nga maoy gipananghid sa dalaga.

Sa imbestigasyon sa AKG7, nasuta nga wa sab mi-text sa iyang classmate ang biktima.

Apan nasubay sa taga AKG7 ang ubang higala niini nakit-an nila Huwebes sa alas 6:00 sa gabii didto sa Barangay San Roque, dakbayan sa Talisay uban sa mga higala niini.

Ang dala nibutyag nga wala siya ma-kidnap ug na-shock siya nganong dunay mga pulis.

Ang mga sakop sa AKG-7 misubay sa suspek nga nagsige'g demanda sa balance sa ransom dali nga milarga paingon sa Mindanao didto sa Tagum dihang nakuha ni ang location niini.

Matod ni Rabanes, nga uban nila ang mga local police didto sa Tagum, gipahigayon niya ang entrapment ug nasikop ang suspek dihang nikobra sa kwarta.

Si Rabanes mibutyag nga hustler ang suspek ug gipalawman pa nila ang pagkuhag detalye sa pagkatawo niini.

Nagtuo sila sa AKG7 Visayas Field Units nga posibli nakakuyog nig dako nga grupo sa sindikato.

Gipadayag niya nga tulo ka account ang gigamit sa suspetsado sa pagdemanda niyag ransom hinungdan nga nagtuo sila nga dunay kaalam kabahin sa maong illegal nga kalihukan.

Samtang giklaro sab niya nga warning kini niadtong uban nga dili dayon sila mo-post sa Facebook kon dunay mahanaw nilang kabanay.

Mas maayo nga i-report nila gilayon ngadto sa kapulisan aron ma-validate ug mahimoan og daling aksyon.

Gipasabot niini nga dunay mga kriminal nga mopahimulos sa higayon diin ang ubang mga tawo aron makakwarta, mosakay sa isyu hinungdan nga daghang mabiktima.

Ang suspek pasakaan og tukma nga kaso sa AKG 7. (B)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph