Gilangkat sa Journey to Recovery (JTR) ang kampiyonato sa 1st Cebu City Mayor Edgar Labella Cup Commercial League basketball tournament human nila pakaginga na usab ang inilog nga Fighter 50, 89-80, sa championship game sa City Sports Institute Gym sa Sawang Calero, Dominggo sa gabii, Disyembre 22.
Upat ka mga sakop sa JTR nga gipangulohan sa most valuable player (MVP) awardee Steve Castro ang mitali og double-figure aron sakmiton ang P100,000 nga ganting salapi sa usa ka semanang torneyo nga gisalmutan sa unom ka mga teams.
Gawas sa 22 puntos ni Castro, ang JTR nga gidumala ni playing coach Alex Cainglet, misandig usab sa kalantip ug kakusog sa mga batan-on nga sila si Cedric Ablaza kinsa mipuga og 19, Shane Menina 16 ug Jaybee Bahio nga may 15 puntos ug 14 ka rebounds.
Gikan sa sayong bahin sa panagsangka permi nang naglabaw ang JTR ug nakaposte kini og 19-15 nga bintaha sa first quarter ug 44-36 sa pagsira sa first half.
Sa tungatungang bahin sa third quarter, nakasikit ang Fighter 50 ug nakapahak kini sa labaw ngadto sa tres puntos na lang, sa dihang nagkumboya sila si Marvin Hayes ug Jaybee Mantilla.
Apan dali ra usab kining gitubag sa tres ni Menina ug Castro samtanng sila usab si Ablaza ug Bahio maoy miatiman sa ilawom nga bahin.
Mitimang usab sa rally si Gileant Delator aron inaton og balik ang labaw sa JTR ngadto sa 11 puntos.
"Game plan gyud namo nga duwaan sila og pakusganay. Lupigon man mi nila sa ilawom. Among gi take advantage ang speed sa mga batan-on. Unya sa coaching sab, bisan og akoy mo instruct, pero maminaw man kog suggestion sa uban. Kinahanglan teamwork gyud mi kay lig-on man ang pikas," matod ni Cainglet kinsa gialsa sa iyang mga players human hingpit nilang naangkon ang kadaugan.
Sa sayo pa, gilubong sa ARQ Builders ang Aspa Formworks, 145-80, aron labnihon ang ikatulong dapit.
Si Vincent Minguito mipaulbo og 25 puntos samtang tinagsang midugang og tag 18, 17, ug 16 sila si Jesus Saga, Ferdinand Lusdoc, Allan Sala alang sa ARQ Builders kinsa nakakuha usaab og 15 gikan kang Jojo Tangkay.
Ang torneyo gipasiugdahan sa Office of the Mayor ubos sa pagpangulo ni Allen Ceballos ug sa Cebu City Sports Commission (CCSC) ubos sa chairmanship ni Edward Hayco.
Miabag sa inadlawng operation mao sila si Cerapion "Dongkoy" Cortes, Jojo Romarate, CCSC manager Amelito Lopez ug commissioner Malilong. (JBM)