ANG kadaghan sa mga tawo sa mga mall ug kahuot sa trapiko maingon nato nga timailhan nga dunay kwarta ang daghang mga lumolupyo karon dinhi sa Metro Cebu labi na sa Syudad sa Sugbo.
Alang kanako, daghan ang posibleng hinungdan niini karon. Ato unyang tan-awn ang kadak-on sa mga remittance sa atong mga kaigsuonan nga tua sa gawas sa nasud.
Pasko baya ang panahon nga magpadala kita og dako-dakong kantidad alang sa atong mga minahal sa kinabuhi.
Lain sab nga hinungdan mao ang mga 13th month ug bonus nga nadawat sa mga empleyado sa kagamhanan ug mga pribadong mga kompanya.
Nagdala kini og kalipay alang sa atong katawhan dinhi sa Syudad sa Sugbo.
Bisan pa man, makita nato nga nisamot ang mga katilingbanong suliran nga dugay nang naghasol kanato.
Pananglitan, naa man kanang kahuot sa trapiko. Nisamot pag-ayo karong panahon sa Pasko. Arang-arang na lang kuno ang kahuot diri sa habagatang bahin sa Metro Cebu kay moluag na man inig labay sa Minglanilla.
Bisan unsaon pa sa atong higala nga si Joy Tumulak diri sa Syudad sa Talisay (niluag gyud tuod ang sa eskina Laray-South Coastal Road), ang modiretso sa south masangit gyud sa Minglanilla. Ambot nganong nagmika ang mga opisyal diha. Hatagan sab unta kini og atensyon ni Kong. Eddie Gullas.
Apan, grabi gyud ang sa amihanang bahin sa Metro Cebu. Bisan unsaon pa ni Mayor Jonas Cortes diri sa Syudad sa Mandaue, kon maghuot diha sa Consolacion ug Liloan, luoy kaayo ang nagpuyo sa amihanang bahin sa Metro Cebu.
Sa akong tan-aw, angayang magtinabangay karon ang mga mayor sa Consolacion ug Liloan uban nilang Kong. Lolypop Ouano ug Kong. Duke Frasco aron masulbad kini.
Dako kita og expectation labi na sa mga Frasco labi na nga ila na karon ang liderato sa lalawigan ubos ni Gob. Gwen Garcia.
Karong nagsunodsunod ang bagyo, angayan sab nga atemanon ang drainage ug ang waste disposal system sa tibuok Metro Cebu.
Subo lang palandungon nga ang mga opisyal karon kay nagsalig sa mga open dumpsites sa Inayawan, Aloguinsan ug Consolacion. Kini kay dugay na nga gipasirad-an sa Environmental Management Bureau (EMB) 7 apan daw way ngipon kining maong ahensya sa pagpakanaog sa ilang cease and desist orders (CDO).
Angay na untang dumbulon sa EMB kining maong mga dumpsite labi na nga na-promote si William Cuñado.
Karong panahon sa Pasko, mahinungdanon sab nga di nato makalimtan ang naglisod natong mga kaigsuonan nga naigo sa linog sa habagatan.
Bisan pa man niining tanan, makaingon gihapon kita nga Malipayong Pasko.
(@anol_cebu sa Twitter)