TUBIG. Bisan pa sa pagsige og bagyo ning buwan sa Disyembre nga nagdala og kusog ug daghan nga ulan apan naa gihapon ang problema sa tubig sa dakbayan sa Sugbo. Sa miagi, gitangtang na ang mga naglingkod sa board sa Metro Cebu Water District (MCWD), nga gituhoan nga maoy hinungdan apan anaa gihapon ang problema sa suplay sa tubig.
Niadtong buntag sa Dominggo kalit lang nga nawala ang tubig sa among dapit sa Talamban apan wala magpahibawo ang MCWD nga mawagtang ang tubig niadtong Dominggo sa among dapit. Sa nangagi, ang MCWD nipahibawo pinaagi sa advertisement kon may pag-undang sa suplay sa tubig.
Gani, sa nangagi nga mga buwan dihang migrabe ang problema sa tubig sa dakbayan mopahiyum lang ko sa panahon nga moreklamo si Torni Frank sa MCWD tungod kay walay tubig sa iyang balay samtang kami sa Talamban naay suplay sa tubig. Tungod sa dakong problema sa tubig, ang MCWD naangaan sa mga nitezen nga “motulo cadiyot wagtang dayon”.
Bisan og way opisina niadtong Dominggo, misuway ko og text ni Ms. Charmaine Kara, ang public information officer sa MCWD, aron pagsuta nganong kalit naundang ang tubig sa among dapit sa may 9:30 sa buntag hangtud sa alas 5 sa hapon. Naproblema mi kay wa man mi makaandam. Nagtuo ko nga ang trabaho MCWD sa dalan duol sa among dapit moay hinungdan apan di diay.
Salamat, Charmaine, kay bisan og off duty ka apan imong gitubag ang akong pangutana. Matod pa ni Charmaine sa iyang text message nga naundang ang tubig sa Talamban area niadtong Dominggo tungod kay napawong kuno ang kuryente sa Visayan Electric nga maoy nagdala sa bomba sa tubig sa MCWD didto sa Pit-os.
Sa nagpadayon nga problema karon sa suplay sa tubig sa kabalayan morag nagkatawa sa hilum ang mga sakop sa board sa MCWD nga gitangtang ni Cebu city Mayor Edgar Labella tungod kay, matod pa, kuwang sila sa katakus nga moatubang ug mosulbad sa problema sa suplay sa tubig sa mga kabalayan.
Ang akong mga higala sa media human nga gipapahawa ang mga direktor sa MCWD Board nga ang kadaghanan tinudlo ni kanhi mayor Tomas Osmeña nagsige og paabot nga matudlo ang bag-o nga mga direktor sa MCWD board nga usa niini among suod nga higala ug kauban sa buhat. Apan hangtud karon wa pa gihapon mogawas ang ilang appointment.
Sa lain bahin, si Gob. Gwen Garcia tungod sa problema sa tubig mimando sa pagputol sa ilang kasabutan sa Manila Water kay wala ang Manila Water wala motuman sa kasabutan. Ang konsorsyum sa Manila Water ug Probinsya sa Sugbo nagkuha sa suplay sa tubig sa Luyang River, Carmen.
Atong nahibaw-an nga ang tubig gikan sa Luyang, Carmen nga gikuha sa Manila Water wa gisuplay sa dakbayan tungod kay, matod pa, mahal ang ilang baligya.