Nalzaro: Merry Christmas sa tanan

INIG hagtok sa takna-an karong tungang gabii, ato na usab nga hangpon og gakson ang Pasko nga mao ang pagkatawo sa atong Manunubos nga si Hesu Kristo. Karong gabii mao usab ang pagtapos sa siyam ka adlaw nga nobenaryo sa Misa de Gallo. Tapuson kini pinaagi sa Misa de Aguinaldo sa nagkalain-lain parokya. Ug sama sa atong tradisyon ug kultura karong gabii mao ang noche buena diin magkatapok ang pamilya og mga kabanay aron maghi-usa sa pagpaambit sa grasya nga ilang gi-andam. Natural naa gyud ang kaon og inum.

Hudyaka, kalipay ug kamaya mao ang mopatigbabaw karon sa mga banay nga magsaulog og mosugat sa Pasko. Pero kining selebrasyon sa Pasko mag-agad lang usab kini sa ikasarang sa paggasto. Kadtong adunay ikagasto, natural malipay gyud. Pero kadtong walay ikasarang alang kanila, ordinaryo lamang kining maong adlaw.

Kining ako praktikal lamang gumikan kay mao man kini ang atong naandan. Paghinatagay, panaghinigugmaay ug pagminahalay ingon man panagdait ang mopatigbabaw. Pero unsa man ang ihatag kon wala kana? Puro lang gugma? Suwayi lang og wala kay ihatag sa imong mga anak ug kinugos dili ba libakon ka ana nila. Apan hatagi sila labi pa sa mga butang nga gusto nila o ba kaha cash nga kuwarta, dili humot ka para nila. Mao kana ang diwa sa Pasko.

Ug kay sugaton naman nato ang Pasko, apil sa atong tradisyon mao ang pagpabuto og mga firecrackers ug paggamit og mga pyrotechnics. Bisan kon kusganon ang kampaniya sa kagamhanan sa pag-discourage sa mga tawo nga dili magpabuto, i-dili naman gyud gani ni Presidente Duterte ang firecrackers apan aduna man gyuy gihapon mogamit niini. Gawas pa, daghan usab ang nagsalig ug nanginabuhi ning maong industriya.

Atong lamang hangyuon ang mga mahiligon nga migamit niini nga magmatngon. Labi na kadtong nahupot og mga armas de fuego nga dili magpataka og pagpabuto sa ilang mga armas kay aron walay maangol ug kinabuhi nga makalas. Merry Christmas na lang sa tanan. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph