MOPAHIGAYON og special session ang Cebu City Council karong alas 9 sa buntag, Disyembre 24, aron ipaubos sa state of calamity ang Sityo Lourdes, Barangay Inayawan human kini naigo og sunog sa miaging semana.
Si Bise Mayor Michael Rama maoy nipatawag og session ubos sa awhag ni Mayor Edgardo Labella aron usab nga makapagawas og pundo ang siyudad ilabi na nga ting-sira na sa book of accounts sa dakbayan, gumikan sa naghinapos nga mga adlaw sa tuig 2019.
Kini aron mahatagan na og tag P20,000 ang mga house owner og housing materials lakip na ang pagtunol sa pack meals nga gilugwayan ni Labella gikan sa tulo ngadto na sa lima ka adlaw.
Samtang si Sen. Bong Go nibisita sa 102 ka pamilya kon kapin 300 ka mga tawo kinsa nagpasilong sa sports complex sa barangay Inayawan.
Sila nakadawat og hinabang gikan sa National Housing Authority, Department of Social Welfare and Development ug personal nga tabang gikan sa right hand ni President Rodrigo Duterte nga si Go.
Ang mga kapin 40 ka nga household owner kon 102 ka mga pamilya makabalik sa pagpuyo sa yuta nga kanhi nila gipuy-an subay sa pamahayag ni Labella kinsa miingon nga dili mahimong gamiton nga rason sa private lot owner ang sunog para sila mapapahawa sa ilang gipuy-an. (PAC)