'Ursula' killjoy

NAHIMONG killjoy ang bagyong Ursula sa mga naghinamhinam nga mopauli sa ilang tagsatagsa ka mga dapit kagahapon, Lunes, Disyembre 23, human gikanselar ang tanang biyahe sa mga barko gikan sa puwerto sa dakbayan sa Sugbo, sa ubang bahin sa Kabisay-an ug Mindanao.

Ang Philippine Atmospheric, Geophysical and Astronomical Services Administration (Pagasa) sa ilang alas 11:00 sa buntag nga weather bulletin niisa sa Tropical Cyclone Wind Signal No. 1 sa Kabisay-an.

Sa naasoy nga signal, awtomatik nga walay barko nga makalawig.

Pasiuanang nakatala ang Coast Guard District (PCG) Central Visayas og 2,610 ka mga strandred nga pasahero sa tibuok rehiyon.

Dugang sa Pagasa, si Ursula nakasulod sa Philippine Area of Responsibility (PAR) kagahapon, Lunes, alas 5:00 sa buntag, Disyembre 23.

Ubos sa Signal No. 1 ang halos tanang dapit sa Sugbo labi na sa Northern ug Central Cebu.

Lakip nga gipaubos sa Signal No. 1 ang Sorsogon, Masbate, Samar, Biliran, Leyte, , Northeastern Bohol, Dinagat Islands ug Surigao del Norte uban sa Siargao Islands.

Si Coast Guard District Central Visayas Spokesperson Lieutenant Junior Grade Michael John Encina nagkanayon nga gikanselar nila ang tanang biyahe sa barko human nga giisa sa Pagasa ang signal warnings.

Niabot usab sa 116 ka rolling cargoes, 47 ka vessels, ug 51 ka motorbanca ang wala na pabiyahia sa PCG 7 tungod sa maong bagyo.

Sa alas 5:00 sa hapon nga weather advisory sa Pagasa nasigpatan ang bagyong Ursula sa 670 kilometros Sidlakan sa Surigao City, Surigao del Norte

Sa susamang bulletin giisa na usab ang Signal no. 2 sa Guiuan, Easter Samar.

Gilauman na usab ang kasarangan hangtod sa kusog mha uwan karong hapon, Martes, Disyembre 24, atol sa Noche Buena.

Ang Bagyong Ursula gadala kini og hangin nga 75 kilometros ang takna, ug pag-unos nga 90 kilometros ang takna, samtang gadagan kini sa 30 kilometros matag oras.

Matod sa officer-in-charge sa Pagasa Visayas Engr. Al Quiblat nga dako gihapon ang posibilidad nga mo-landfall ang bagyo sa Northern Cebu.

Apan kon magpadayon ang track niini anaa kini sa Masbate o sa Biliran mo-lanfall nga duol gihapon sa Northern Cebu.

Tungod sa 300 radius niini lapad ang mamahimong kadaot nga mahatag sa maong bagyo.

Karong buntag, Martes, Disyembre 24, masinati na ang 40-50 kilometers per hour nga hangin samtang sa hapon moabot kini sa 70-80 KPH. Mas makasinati usab og daghang uwan ang Sugbo sa Martes sa hapon hangtod sa pagsugat sa Pasko ug sa buntag.

Sa Disyembre 26, masinati ang maayo nga panahon sa Sugbo ug mogawas sa PAR ang bagyo sa petsa 27 sa gabii o sa 28 sa buntag.

PDRRMC

Si Cebu Gob. Gwendolyn Garcia nipatawag og tigom sa Provincial Disaster Risk Reduction and Management Coucil (PDRRMC) sa Kapitolyo kagahapon, Lunes, Disyembre 23, alang sa lakang nga himuon niini sa pag-igo ni ‘Ursula’ sa Sugbo.

Samtang, gisaka na sa Cebu Provincial Police Office (CCPO) ang ilang alert status tungod sa nagsingabot nga bagyo sa probinsya sa Sugbo.

Matod ni Police Colonel Roderick Mariano, direktor sa CPPO, nga iyang gimandoan ang iyang mga chief of police sa norte nga bahin sa lalawigan nga sugdan na ang ilang pagpahimangno sa mga residente kagahapon.

Lakip sa iyang gipahimangnoan ang tanan niyang personnel nga unahon sa pagbutang sa luwas nga dapit ang ilang tagsatagsa ka pamilya una sila mohimog rescue operation.

Si Mariano niapil usab sa tigom sa PDRRMC alang sa hugot nga kooperasyon.

UBANG MGA LGU

Ang local government units (LGU) sa dakbayan sa Sugbo, Talisay ug Lapu-Lapu ninghimo usa sa pagpangandam pinaagi sa ilang City Disaster Risk Reduction and Management Council.

Si Lapu-lapu City Mayor Junard ‘Ahong’ Chan nipatawag sa ang representante sa Pagasa, May Casilagan, alang paghatag og pagpasabot sa lihuk ug characteristic sa maong bagyo.

Ang Lapu-Lapu daghang mga isla nga sakop sama sa sa Olango, Caubian, Caohagan, ug Pangan-an.

Gipasiguro nga adunay andam nga relief goods kon ugaling magkinahanglan.

anihang buntag pinaagi sa barge ngadto sa mga isla, hinuon matud ni Chan nga anaa na daan usab standby nga mga relief goods ngadto sa mga isla.

Sa dakbayan sa Talisay, nipatawag og emergency meeting si Mayor Gerald Anthony Gullas sa skeletal force sa siyudad, ilabi na sa CDRRMC, sa City Of Talisay-Traffic Operations Development Authority (CT-TODA), kadagkuan sa Aksyon Agad Team ug uban pa.

Nimando si Gullas alang sa pagpaandam sa evacuation centers sa tagsatagsa ka mga baranggay.

Ang Cebu City Government nangandam sa posibleng dautan nga epekto dala sa bagyo.

Si Mayor Edgardo Labella, nitahas kang Konsehal Dave Tumulak uban ni Harold Alcontin sa Local Disaster Risk Reduction and Management Office aron alerto ang team uban sa barangay volunteers para sa dali nga pagresponde sa higayon nga kinahanglanon ang ilang presensiya. (HBL, ANV, AYB, FMD, PAC)