LIMA ka mga babaye ug duha ka mga lalaki ang gisikop sa kapulisan human nasapong nagsuyop og ilegal nga druga sa Macaibay St., Barangay Camaman-an, dakbayan sa Cagayan de Oro.
Ang mga dinakpan nailang si John Fritz, 18 , residente sa Cronin, Camaman-an; Eddery, 18, nga taga Xavier Ecoville, Lumbia; Honey Fe, 23, nga taga Kalubihon, Iligan City; Clark, 23, Zone-6, Gumamela Extn. Carmen, CDOC; Elvie, 20, taga District 1, Consolacion; Marry Grace, 21, taga Barra, Macabalan; ug Jelly, 21, taga Abellanosa Street, Brgy. 17 (mga bansagon gipugngan).
Sa impormasiyon gikan sa Police Station 9 (PS9) sa Cogon, nasayran nga nasapon sa aktong nagsuyop ang maong mga batan-on rason nga gisikop.
Narekober gikan sa mga suspetsado ang mga drug paraphernalia sama sa tulo ka mga aluminum foil nga gihimong gutter, duha ka aluminum isip tooter, tulo ka aluminum nga gihimong dagom ug uban pa.
Ang maong mga dinakpan ang kasamtangang nagtingkagol sa bilanggoan karong mga panahona.