WALA makalusot bisan ang ulo sa litson human nga kini gikumpiska sa Bureau of Animal Industry Veterinary Quarantine Services lakip ang kahon sa mga giprosesong produktong baboy niadtong Disyembre 20 sa pantalan sa Macabalan, dakbayan sa Cagayan de Oro.
Kini human sa hugot nga kampanya ug pagpatuman sa ordinansa sa dakbayan ilabi na sa temporaryo nga pag-ban sa tanang produktong baboy aron nga dili makalusot ang mga apektadong prudokto sa African Swine Fever dinhi sa dakbayan.
Giingong ang maong mga nakumpiskang produkto gikan pa sa Bohol, Cebu, ug Manila.
Gisusi sa Anti-African Swine Fever Task Force sa pagpangulo sa tinugyanan sa City Veterinary Office ilabi na ni doctor Lucien Anthony Acac ang maong kahon nga dunay sulod sa nahisgutang produkto.
Gibutyag ni Acac nga ang mga nakumpiskang mga produktong baboy ug ulo sa litson gikumpiska kini tungod kay gikonsidera kining illegal shipment gumikan kay kulang kini sa mga importanteng dokumento nga gikinahanglan ug gipangayo gikan sa National Veterinary Quarantine Services.