ISIP manunulat, sayon ra kaayo namo mohimog estorya kabahin sa ubang tawo. Apan lisod kaayo kung ang among isulat kay sakop sa among pamilya.
Mas lisod kung kabahin kini sa among kasubo ug pagbangutan sama sa nahitabo sa among kinamagulangang igsuon nga si Antonio “Tony” Roldan, Jr. Namatay siya sa hapon sa Disyembre 16 sa Stage IV lung cancer.
Paspas kaayo ang paglipang sa iyang sakit kay niadto lang Agosto o Septyembre nahibal-an ang iyang sakit. Ang nakalibog pa kay wala siya manigarilyo.
Bisan manigarilyo ang among anhing amahan nga sapatero, walay manabako kanamong iyang 11 ka mga anak. Una siya masulod sa Makati Medical Center ug unya sa Unihealth Southwoods Hospital sa Biñan, Laguna diin siya nabugtuan og gininhawa, niagi pa siya’g “alternative medicine” ug “food supplement” aron malikayan ang “chemotherapy” og “radiation” tungod sa iyang hamtong nga panuigon.
Nindot unta ang resulta niini apan ulahi na ang tanan kay nikuyanap na ang sakit sa ubang parte sa iyang lawas. Naglisod na siya’g ginhawa busa hangin gikan sa tubo sa “oxygen tank” na lang sa Intensive Care Unit sa ospital ang nakapabuhi kaniya.
Didto natawo si Tony sa Cebu City niadtong Mayo 16, 1946 sa among ginikanan nga si Antonio Sr. ug Crispina Campasas apan nagtubo siya sa lungsod sa Padada, Davao del Sur nga bag-o lang gitay-og sa 6.9 nga linog.
Nisulod siya sa Regional Major Seminary sa Davao apan wala siya nagpadayon sa pagkapari. Hinunua, naminyo siya sa iyang kaubang magtutudlo sa Holy Cross of Davao College nga si Cecille Conanan ug may upat ka anak nga sila si Niño, Nene, John-john ug Mark kinsa nagselebrar sa ilang ika-45 nga sumad sa ilang kaminyuon karong tuiga.
Usa siya sa pinakaunang “lay theologian” sa Davao ug kauban sa pagtukod sa St. John XXIII Catechetical Center ug pagpaguwa sa pahayagang “Ang Taboan” nga “The Davao Catholic Herald” na karon sa Archdiocese.
Nahuman niya ang AB Philosophy sa seminaryo, M.A. on Pastoral Theology sa Ateneo de Davao University ug Ph. D. on Organizational Development and Planning sa Southeast Asia Interdisciplinary Development Institute.
Nilalin sila sa Manila diin nitabang siya sa pagpalambo sa Philippine National Oil Company sulod sa pito ka tuig isip Organizational Development Specialist ug nahimong Senior Vice President sa Human Resources Division sa PhilSteel Group of Companies.
Nahimo siyang presidente sa Organization Development Associate International ug chairman sa Advisory Council sa Philippine Chapter sa Berlin-based nga Transparency International.
Gitukod niya ang iyang kaugalingong “consultancy firm” nga Roldan’s HRD Philippines diin iyang gipakuyanap ang Kaibigan Seminars sa National Steel Corporation, PLDT ug uban pang kompanya ug paghimo sa code of conduct sa Armed Forces ug Philippine National Police.
Naila usab siya nga “father of Integrity Circles” isip consultant sa programa sa gobyerno nga Moral Recovery Program ubos sa administrasyon ni Presidente Ramos.
Subo man kanamo nga nawad-an kami og igsuon apan malipayon gihapon kay kahibalo kami nga daghang kinabuhi nga iyang nahikap ug nagmahal kaniya.
Panaw sa kalinaw Big Brother!