BANSALAN, Davao del Sur -- Giwagtang na sa mga kadagkoang opisyal sa kapolisan ang direktiba sa “muzzle taping” sa ilang mga armas panahon sa Pasko ug Bag-ong Tuig apan gipasidan-an nga mopailawom gyud sa disiplina aron di mataktak sa ilang trabaho.
Sumala ni Police Major Rodante Varona, hepe sa Bansalan Police Station, nga lahi na ang ilang mga sakop sud ning panahona sanglit nagtamod gyud kini sa mga mandato ni Presidente Rodrigo Duterte.
Uwahing gihimo sa kapolisan ang pagtaptap sa mga buka sa armas niadtong tuig 2014-2015 nga holiday season.
Masaligon sab ang hepe nga wa’y mga pasaway sa iyang mga sakop ug nagatuman sa kamanduan sa ilang mga labaw.
Adunay one-strike policy nga gipatuman ang Philippine National Police sa tanan nilang sakop ilabi pa sa mga opisyal sa mga siyudad, probinsya ug kalungsuran.
Naka-alerto na ang kapolisan sa lugar atol sa pagsugat sa Pasko ug hangtud na sa taliabot nga ika-51 ka tuig nga anibersaryo sa pagkamugna sa Communist Party of the Philippines (CPP) ang toong kamot sa rebeldeng New People’s Army (NPA) sa Disyembre 26.
Hinuon, gitataw ni Varona nga wa silay namatikdang kisaw sa mga walhong komunista sa mga bukirang parte sa lugar apan gipakusgan gihapon ang intelligence monitoring.
Paboto sa Pasko
Gibutyag sab ni Varona nga hugot nilang bantayan nga di makalusot ang mga ilegal nga baligyang pagboto human gitugtan ang mga manindahay nga mamaligya sa firecracker designated area sa dalang Bonifacio didto sa Brgy. Poblacion Dos.
Nagpasidaan ang kapolisan nga gidili ang mga baligyang Pla-pla, Super Lolo, Goodbye Philippines ug uban pang matang sa mga dagkong paboto kay ila kining kumpiskahon ug dakpon ang molapas niini.
Bugtong mga gagmay nga paboto ang gitugtan ug mga fireworks display sa kawanangan.
Apan, makig-alayon sab ang kapolisan sa Bureau of Fire Protection aron luwas sa sunog ang lugar diin gibaligya ang mga paboto.
Kahinumdomang ang mga baligyang paboto maoy nakasunog sa merkado publiko sa lugar niadtong Disyembre 29, 2009. (Orlando B. Dinoy)