MATANAO, Davao del Sur -- Onse ka mga pamilya ang apektado sa linog human naigo sa epicenter sa magnitude 6.9 nga linog niadtong Disyembre 15.
Usa ka masulob-ong Pasko ug Bag-ong Tuig ang ilang masinati human nadamyos sa kalamidad ang ilang mga balay ug propedad.
Mokabat sab sa 200 ka mga pamilya ang naigo sa kalamidad sa Barangay Asinan diin daghang balay ang nadamyos sanglit gipalibutan sa mga fault lines ang ilang lugar.
Giangkon ng Krezel Dianga, 34-anyos, nga nagsagol ang kaguol ug kakulba nga iyang gibati sanglit kini ang unang Pasko nga anaa sila sa evacuation center maabtan.
Di niini masulti kun saulogon gihapon ang Pasko taliwa sa kalamidad nga mihapak kanila.
Apan, alang niya mahinungdan nga kauban gihapon ang tibuok pamilya ug wa’y kinabuhing naangol o nakalas human ang kusog nga linog.
Sumala ni Krezel nga mag-ihaw lang sila og manok nga bisaya aron ilang saluhan atol sa Noche Buena karong tungang gabii.
Gipabalhin na sa lokal nga gobyerno ang mga bakwit sa Asinan ngadto sa silingang Brgy. Bangkal human nga di na mahimong kapuy-an ang ilang lugar.
Pipila sab ka mga bakwit ang naninda sa evacuation center aron naa sila’y panginabuhian.
Matod ni Arsella Mata, 60-anyos, nga kinahanglan nilang magpondo og kwarta kay aron adunay magamit pag-abot sa panahon kay basin og wa na’y madawat nga hinabang tungod sa kadaghang tabagonon sa gobyerno.
Sa Brgy. Kapok, tubig maoy panawagan sa mga biktima sa linog human naguba ang ilang water system sa halos tanang barangay.
Mga trapal ug tent sab ang gikinahanglan sa ubang bakwit human nawad-an og balay.
Gipasalig hinuon ni Mayor Vincent Fernandez nga dili pasagdan sa lokal nga gobyerno ang ilang mga bakwit.
Niadtong Sabado, Disyembre 21, gibisita ni Senador Ronald Dela Rosa ang mga bakwit sa Brgy. Poblacion.
Nahupay sab dyutay ang gibating kaguol sa mga biktima human gihalaran sila og Christmas song sa opisyal ug gidasig nga di mawad-an og paglaum luyo sa kalamidad.
Human niini, nanghatag si Dela Rosa og mga hygiene kit, habol, banig ug trapal ug adunay pinaskuhan ang mga bata. (Orlando B. Dinoy)