KIDAPAWAN CITY -- Grupo sa Bangsamoro Islamic Freedom Fighters (BIFF) ang gitudlo nga mga suspek sa duha ka sunod-sunod nga pagpamomba nga mitay-og sa probinsya sa Cotabato.
Giila ang mga naangol nga sila Rolando Amistoso (grabe ang kahimtang), Maria Vivian Bulahan, Reynante Barbon, Angelica Cabatingan, Ronald Eslit ug Melanie Vilar, pulos mga molupyo sa Barangay Poblacion, Libungan Cotabato.
Matud ni Libungan Cotabato Mayor Christopher “Amping” Cuan nga unang mibuto ang usa ka improvised explosive device (IED) atbang sa Remerata Store sa Barangay Poblacion, Libungan alas 6:10 sa gabii, Disyembre 22, diin unom ang naangol.
Gisundan alas 6:14 sa gabii 15 metros ang gilay-on sa una nga pagbuto og suwerte nga walay naigo.
Ang mga naangol ang gipangdala sa Mount Blessing Hospital sa Libungan, Dr. Ramon Pisante Memorial Hospital sa Midsayap samtang si Amistoso gibalhin sa Cotabato Regional and Medical Center (CRMC) sa Cotabato City.
Gikomperma sab sa mga sakop sa Explosive Ordnance Disposal Team sa Philippine Army nga ang duha ka bomba gama sa 60 mm mortar projectile.
Nanawagan sab si Cotabato Senior Board Member Shirlyn Macasarte Villanueva, kanhi BM Rolly Sacdalan ug Cotabato Vice-Governor Emmylou Mendoza nga undangan na ang pagpakatag sa mga text nga dili biripikado gumikan makadugang lamang kini sa kalisang sa katawhan.
“Magkaisa at manalangin para maghari ang kapayaan sa probinsya ng Cotabato,” suma ni Villanueva.
Gihangyo sab ni Mayor Amping Cuan ang mga molupyo sa Libungan nga igmaton ang ilang kaugalingon, dili magkompiyansa ug itaho dayon sa mga awtoridad ang mga butang nga gidudahan nga bomba lakip na ang mga tawo nga lahi og panglihok. (Edgar Fuerzas)