Nalzaro: Malipayon ang Pasko sa mga Pinoy

MATOD pa sa usa ka survey sa Social Weather Station (SWS) nga sa matag lima ka Pilipino, upat ang moingon nga malipayon ang pagsaulog sa Pasko dinhi sa Pilipinas. Gihimo ang survey Disyembre 13-16, 2019 diin adunay 1,200 ka mga respondents (kanang gipangutana sa survey). Kadaghanan mga batan-on nga nag-edad og 18 anyos pataas.

Face to face ang pagpahigayon sa survey. Buot ipasabot nga ang respondents personal nga gipangutana, dili pinaagi sa pag-fill up sa questionnaires lang. Ang pangutana: “Malipayon ka ba ning pagsaulog sa Pasko?” Ug 79 porsiyenyo ang mitubag nga malipayon. Sa mao gihapon nga survey daghan ang nagkanayon nga mas maayo pa sila ang mohatag kay sila ang hatagan o makadawat og regalo sa Pasko. Kay mas malipayon ang mihatag.

Unsa man ang rason nga daghan man ang mga malipayon sa pagsaulog sa Pasko? Kining kalipay “subjective.” Buot ipasabot nga naa ra kini sa usa ka tawo. Unsa man ang nga butang nga makalipay kaniya, posibleng di ikalipay sa uban. Mora ni og “gugma” nga magdepende sa tawo nga nahigugma.

Kining pipila ka porsiyento nga miingon nga dili magmalipayon ang ilang Pasko, siguro mao kadtong mga tawo nga grabeng naghambin og problema o nakasugat og katalagman ug trahedya. Aw, kinsa ba ang malipay kon naigo ka sa bagyo, nasunogan o namatyan og mahal sa kinabuhi?

Ang sociologists nga sila si Dr. Jayeel Cornelio sa Ateneo de Manila University ug Dr. Manuel Sapitula sa University of the Philippines (UP) mihimo og pagtuon ngano nga lahi ang pagselebrar sa Pasko sa Pilipinas. Ang Pasko gihandum sa tanan dinhi sa ato kay giila nga festival. Bout ipasabot mao nga anaa na ang “expectation” sa mga Pinoy nga dunay selebrasyon nga pagahimuon sa usa ka adlaw nga lahi sa ubang mga adlaw matag tuig.

Ikaduha mao ang positibo nga disposisyon sa katawhan sa Pasko may labot sa pagsaulog sa atong tinuhuan nga Romano Katoliko. Giila kini nga kapistahan sa Simbahan, diin 80 porsiyento sa mga Pinoy Katoliko mao nga gipaabut ang kamaya ug kasadya luyo sa mga kalamidad. Kana ang nakalahi sa atong kasaulogan dinhi itandi sa ubang kanasuran. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph