HAPIT tanan kun 93 porsento sa mga Pilipino malaumon nga mosugat sa tuig 2020, sumala pa sa usa ka ulahing survey sa Pulse Asia. Pito ka porsento lang ang wa pa makahukom, samtang menos sa usa ka porsento ang way paglaum.
Ang maong survey nagpakita nga nisaka og two percentage points ang gidaghanon sa mga Plipino nga malaumon gikan sa 91 porsento nga natala sa Disyembre 2018. Nisaka kini sa National Capital Region, Visayas ug Mindanao apan nikunhod sa Balance Luzon.
Mahitungod sa socio-economic class, ang percentage sa mga Pilipino nga niingon nga malaumon silang mosugat sa tuig 2020 nisaka sa Class E, ang kinaubsan nga socio-economic class, apan nikunhod sa class ABC.
Nganong mahinungdanon ang resulta sa maong survey? Nagpakita kini sa panglantaw sa kinabag-an sa mga Plipino sa umaabot nga tuig. Matag abot sa usa ka bag-ong tuig, dala niini ang panghinaut sa katawhan sa mas masanag nga kaugmaon.
Di mawagtang sa matag usa kanato ang pangandoy ug pangindahay nga mahaw-as sa kalisod ug moumento ang panginabuhi. Nunot niini ang taho nga ning tuiga, mas daghan usab ang mga Pilipino nga nakakita og trabaho.
Apan ang paglaum, mga pangandoy ug pangindahay angay nga ubanan sa kakugi ug panlimbasog aron matuman ang atong mga damgo. Di pareho ni Juan Tamad nga naghigda ilawom sa punoan sa bayabas kay naghuwat kon kanus-a matagak ang bunga.
Ang tuig 2020 ubos sa Year of the Metal Rat sa Chinese zodiac. Ang atong nasayran sa ilaga mao nga kusog kining manungkab sa mga pagkaon sa kusina, dangan sa mga humayan, kamaisan ug kalubian ug mokitkit pa sa atong mga sinina.
Mao nga dihay usa ka tawo nga nasuko kay gikitkit sa ilaga ang iyang mga sinina. Nagdakop siya og usa ka ilaga ug, ginamit ang pliers, iyang giibtan sa tanang ngipon ug giingnan, “Ingna imong mga kauban nga niabot na ang inyong dentista.”
Daghan nga popular nga mga tawo nga natawo sa Year of the Rat, lakip nila ni George Washington, ang unang pangulo sa Amerika; kanhi US president John F. Kennedy, ang composer nga si Wolfgang Mozart ug ang mga magsusuwat nga sila si William Shakespeare, Charlotte Bronte ug Truman Capote.