DAGHANG mga opisyal sa Pilipinas ang dili na tugotang makasud sa Estados Unidos (US). Sa US 2020 budget bill, nga gipirmahan ni Presidente Donald Trump gidid-an ang mga tawo nga adunay kalabutan sa pagka-priso ni Senator Leila de Lima. Nag-apil usab hinuon kini sa mga opisyal gikan sa gobiyerno sa Turkey, Egypt ug Saudi Arabia nga adunay piniriso nga mga American diplomats ug nationals. Niining mga nasura aduna tingali katarungan nga manghilabut sila sa napriso nilang mga diplomats ug nationals apan dili dinhi sa ato nga usa ka Pilipino maoy napriso human gihukman sa atong mga hukmanan nga sad-an.
Ang re-aksiyon sa tigpamaba sa Department of Foreign Affairs (DFA) nagtumbok nga kini usa ka pag-panghilabut sa usa ka higalang nasud sa atong domestic legal processes. Atong mapa-abut nga mosamut og ka-islag ang pagtagad ni Pres. Duterte sa US. Dili kini ang unang gihimo sa mga Amerikano sa Duterte administration kay gihimo kini ni kanhi US Pres. Obama sa dihang iyang gisaway ang war on drugs ni Duterte. Gibalikas man gani ni Digong ang presidente sa Amerika. Napun-an kini sa pagkanselar nila sa pagpalit unta nato og mga armas gikan kanila.
Samtang daghan sa atong kaigsuonan ang mopaluyo sa US apan magduda kita kon ato ba silang higala o kaaway? Sobra ra ang ilang kahipukrito kay samtang estrikto kaayo sila sa pagpatuman sa human rights apan giunsa man nila ang mga nasud sa Iraq, Libya, Afghanistan ug uban pa? Bisan sa US daghang human rights violations.
Daghan sa atong kaigsuonan nga nisugat sa Pasko sa mga terminal sa barko, ayroplano ug bus. Maayo na lang kay dihay gitagana ang Cebu City government nga kapahuwayan sa uban nga na-stranded nga mga pasahero. Mas maayo nga magsabut ang mga local government unit (LGUs) ug ang mga tag-iya og barko nga palitan og ticket sa mga pasahero aron mag-alayon sila sa pag-atiman sa sunod nga ma-stranded nga mga pasahero.
Niining panahona nakita na gyud ang panginahanglan sa pagbutang og permanenteng taxi waiting área. Kinahanglan nga kini anaay kapasilungan panahon sa uwan ug init. Kinahanglan usab nga ila-in gayud ang priority lane alang sa mga PWD, senior citizen ug mga mabdos. Kinahanglan gyud nga adunay ordinansa nga himuon alang sa pagpatuman niini aron dili kini mantinilan lang diin daghang mangreklamo. Murag wa lang kini hatagi og pagtagad tungod kay ang atong mga dagkung opisyal sa gobiyerno magsakay man og mga awto. Palihug lang kay kanang mga awto nga inyong gigamit ug ang gas niana gikan sa buhis sa katawhan nga nag-antus og linya aron paghuwat og sakyanan. (mannyrabacal1144@gmail.com )