SUKWAHI sa pagtuo sa kadaghanan, mga inilog nga teams ang gipangtumba sa ilang biya nga mga kaatbang sa nagpadayong NBA season atol sa kasaulogan sa Pasko didto sa Estados Unidos kagahapon.
Lakip sa nakaangkon og makapakaging nga kapildihan mao ang title-contender Houston Rockets nga sa wala damha napahagsa sa ngangiwit nga Golden State Warriors, 116-104.
Si Damion Lee midibuho og double-double nga performance pinaagi sa iyang 22 puntos ug 15 ka rebounds sangtang midugang usab og 20 puntos si Draymond Green, 16 niini sa second half alang sa Golden State kansang mga star players nga sila si Stephen Curry ug Klay Thompson padayon pang nagpaalim sa ilang mga angol.
Ang Rockets nga mihaom sa ikaupat nga puwesto nagkumkom sa 21-10 nga record.
Si Russel Westbrook mipabaha og 30 puntos ug 12 ka rebounds, James Harden mikutlo og 24 puntos ug 11 ka assists.
Bucks kaging sa 76ers
Laing inilog nga nasukamod kagahapon mao ang Milwaukee Bucks, ang no. 1 team sa East. Ang Bucks ug ang kasamtangang MVP awardee nga si Giannis Antetokoumpo gibuntog sa Philadelphia Sixers nga gitimunan sa higanting si Joel Embiid, 121-109.
Gawas sa 31 puntos ug 11 ka rebounds, si Embiid mao usab ang responsabli sa pagkapugdol sa opensa ni Antetokounmpo kinsa nalimitahan lang ngadto sa 18 puntos.
Sa samang higayon ila usab nga natupngan ang franchise record nga pinakadaghan og tres.
Lakers giusban sa Clippers
Ang Clippers padayon sa ilang dominasyon batok sa silingang team Lakers, 111-106.
Si Kawhi Leonard mipuga og 35 puntos, 11 sa fourth quarter, 12 ka rebounds ug lima ka assists alang Clippers nga nabiyaan og 12 puntos sa first half.
Kini maoy ikaduhang kadaugan sa Clippers batok sa Lakers sa karon nga season.
Sa kasaysayan, si Leonard maoy bugtong Clipper nga naka 35 puntos atol sa Pasko ug ikanapulo nga player sa NBA nga adunay labing minos 35 puntos, 10 ka rebounds ug lima ka assists sa matag Disyembre 25 nga duwa.
Sa habig sa Lakers si Kyle Kuzma mitali og 25, 24 kang Anthony Davis ug 23 kang LeBron James.
denver gitip sa nop
Gisurprisahan usab sa New Orleans Pelicans (no. 14) ang no. 2 Denver Nuggets, 112-100. Si Brandon Ingram mipaulbo og 31 puntos alang sa Pelicans (9-23) nga 2-0 batok sa Nuggets sa karon nga season.
Sa kadaugan, ila usab nga napakgang ang pito ka nagkutay nga daog sa Nuggets (21-9). Sa habig sa Nuggets, si Nicola Jokic mipupo og 23 puntos ug 10 ka rebounds.
Raptors gilubong
Sa lima ka mga duwa sa Pasko, bugtong ang Boston Celtics ray inilog mga midaog. Kini human gikusokuso ang defending champion Toronto Raptors, 118-102, ubos sa pagpangulo ni Jaylen Brown nga may 30 puntos.
Si Fred VanVleet mikolekta og 27 puntos alang sa Raptors (21-10) nga anaa karon sa ikaunom nga puwesto sa East samtang ang Boston (21-7) mipahugot sa ilang paghupot sa ikaduhang luna. (JBM)