TULO na lang ka adlaw ug mobabu na gyud ang 2019. Isip balik-lantaw, akong giisip nga mahinungdanong kalambuan ang pagkaapil nako sa Immaculate Conception Grand Choir.
Taudtaud na kong wa makasimba sa misa de gallo mao nga bisan di kompleto ang pagserbisyo nako sa choir, giisip ko gihapon kini nga achievement kay matud pa sa among choir master (may dalang komedya) nga si Sir Ronald Rio (giabagan ni Filjun ‘Pipoy’ Laingo) nga kon maayo ang among pagkanta ‘makatabang kini nga mahalangit ang nanimba.’
Seguradong nakatambong mo og labing menos usa ka Christmas party. Kasagaran anaa himoa sa kasilinganan.
Nindot kini nga kalihukan kay makita gyud ang diwa sa Pasko sa pagtinabangay sa mga buluhaton, pag-inambitay sa mga blessings nga nadawat ug paghugoyhugoy sa mga silingan.
May mga higayon gani tingali nga magkauli ang maayong kabubut-on sa managsilingan nga nagkabingkil tungod niining mga kalihukana.
Kanatong tanan, malipayong Pasko ug bulahang bag-ong tuig 2020.
Gipaabot nga manghawod sa kita sa takilya ang pelikula ni Vice Ganda ug Anne Curtis nga The Mall, The Merrier. Matud pa ni Vice sa iyang pagbisita sa Cebu niadtong nilabayng semana, nga iya gyud nga i-claim nga manghawod ang ilang proyekto. Positive thinking.
Kauban ni Vice pagbisita sila si Elise Joson, Tony Labrusca, Jameson Blake ug ang palalab ni Vice nga si Ion Perez. Morag gipadistansya ni Vice si Ion (ambot ngano) mao nga wa namo matsika.
Dako kunog kalahian sa Fantastica sa niaging tuig ang The Mall, The Merrier bisan pag parehas kini nga komedya. Tan-awon bi.