NAHIMONG kompleto ug malipayon ang pasko sa mga kabatan-onang gitawag ug Children in conflict with the law CICL sa Homecare Center sa Brgy Gun-ob dakbayan sa Lapu-Lapu.
Kini human nga usa ka Christmas party ang gipahigayon ni Kongresista Paz Radaza sa naasoyng pasilidad niadtong milabayng Dominggo, Disyembre 22.
Gipahigayon ang naasoyng Christmas Children’s Party sa bag-ong nahuman nga Covered Court sulod sa pasilidad.
Kauban sa kongresista nga mitambong sa party mao ang pangulo sa City Social Welfare and Development Office CSWDO nga si Ermelita Degamo ug ubang staff sa DSWD ug sa naasoyng pasilidad.
Atol sa kalihukan gipakita sa mga kabatan-onan ang ilang talento pinaagi sa pagdalit ug nagkadaiyang presentasyon sama sa sayaw ug kanta nga mga pang-pasko.
Human sa programa usa ka salo-salo alang sa tanan ang gipahigayon diin dungan nilang gisaw-an an lami-an nga pagkaon nga gidalit alang kanila.
Gawas nga nabusog sa lami-ang pagkaon napuno usab ang ilang pagbati sa kalipay human nga giaporan sila ni Radaza ug mga bundles of joy nga gilangkoban sa mga duwa-an ug prutas.
Lakip sa nakadawat ug bundles of joy ang tanang staffs sa DSWD nga maoy nagdumala sa naasoyng pasilidad.
Kahinumduman nga ang Home Care Center for Children natukod dihang ang kongresista mao pa ang mayor sa dakbayan.
“Love man gyud ni nako ang mga bata. Duol gyud ni sila sa akong dughan mao mo make time gyud ko nga maka celebrate og Christmas party uban nila”, dugang ni Radaza. (GCM)