KAPIN P3 milyones nga balor sa drugas ang nasakmit atol sa managlahing anti-illegal drugs operation sa dakbayan bisperas sa Pasko ngadto na sa pagka-petsa Disyembre 25.
Unom ang nangadakpan atol sa maong pagpangronda diin usa dinakpan nasakmitan og drugas balor P 2 milyones.
Si Rod Warren Maraon, 37, taga - dan C. Padilla, Barangay Duljo Fatima, siyudad sa Sugbo ang gi buy-bust sa mga operatiba sa Drug Enforcement Unit sa Mambaling Police Station, gipangulohan ni PCapt.Francis Renz Talosig ang hepe sa Mambaling Police Station 11.
Si Maraon niadtong tungang gabii sa Disyembre 24.
Si Pcapt. Talosig mihulagway kang Maraon nga usa ka high value target sa Central Visayas tungod sa kadako sa nasakmit nga drugas gikan kaniya.
Gawas kang Maraon, laing tulo ka mga tao ang nadakpan niadtong Lunes, Disyembre 23 naglangkob nilang Felix Saligo, 61, taga – C. Padilla St. Barangay Duljo Fatima, nakuhaan og P50,000 nga balor sa drugas.
Si Saligo gidakop sa mga sakop sa Provincial Intelligence Branch sa Cebu Provincial Police Office pinangulohan ni PLt.Col.Marlu Conag ang pangulo sa PIB.
Ang duha nasikop sa mga sakop sa San Nicolas Police Station nga sila Jinky Entera, 48, ug Enrique Dibdib, 48, pulos taga - Barangay Calamba.
Nasakmit gikan sa duha ang kapin sa P800,000 nga balor sa shabu didto ra usab sa Barangay Calamba.
Samtang atol sa adlaw sa Pasko duha ka mga lalaki ang gibalhug sa bilanggoan human madakpi sa gihimong pag pangronda sa mga sakop sa San Nicolas Police niadtong Disyembre 25 sa gabii.
Si Pmaj. Kenneth Paul Albotra, hepe sa San Nicolas Police Station maoy nangulo sa maong operasyon nga miresulta sa pagkasikop sa duha ka mga dinakpan.
Gii-la ni Albotra ang mga dinakpan nga sila Jovane Lauron, 30, taga - Barangay Sawang Calero ug Jude Villas, 28, taga - Barangay Lahug ning siyudad.
Nasakmit sa mga operatiba ang gibana-bana sa 36 gramos nga shabu nga moabot na sa kapin P200,000 nga balor sa shabu.
Sumala pa ni Albotra nga si Lauron kansang panginabuhi isip usa ka florist, apan nahibaloan nila base sa saysay sa mga silingan nga daghan ang mag-anhaan nga mga tao sa giabangan nga gamay nga balay sa mga dinakpan. BBT