BISPERAS sa kasaulogan sa Pasko dihang gidunggab ang usa ka lalaki hinungdan sa kamatayon niini mga alas 7:24 sa gabii sa Disyembre 24 sa Purok 3, Barangay Tambacan, Iligan City.
Nakabsan sa kinabuhi sulod sa ospital si Armando P. Sarsaba Jr., 24, adunay kapuyo, trabahante isip room boy ug residente sa susamang dapit.
Gitumbok nga suspetsado mao si Nanding Alcano, walay trabaho, residente sa dapit.
Sa inisyal nga imbestigasyon sa Iligan City Police Station 4, nasuta nga kuyog sa biktima ang iyang kaipon niadtong tungora nga mabdos ug paingon unta nga manimba aron pagtabo sa kapaskohan.
Samtang nagbaklay ang duha ka mag-partner kalit silang gitabo ni Alcano ug giagbayan si Sarsaba sa abaga.
Namulong pa kini daw nganong giluiban ang iyang partner hinungdan sa kakurat sa biktima.
Sa walay daghang sulti, giluba ninii makapila ka higayon hinungdan sa pagkaigo sa dunggan, abaga ug sa iyang dughan nga bahin.
Human sa insidente, daling misibat ang suspetsado.
Samtang ang biktima gidali og dala sa balay tambalanan apan tungod sa daghang samad nga naangkon, namatay kini mga alas 10:30 niadtong gabhiona.
Matud sa kaipon sa biktima nga dili sila soud sa suspek nganong namulong og ingon ato apan iya lang nahibaloan nga notoryos kini sa dapit kinsa gipangita na karon sa kapolisan.
Si Police Colonel Michael Pareja, ang city director sa Iligan City Police Office, nasubo sa gidangatan sa biktima ug natigayon pa atol sa pagtabo sa Pasko.
Gipasalig niini nga madakpan gihapon ang suspetsado labina ilang giingong dili sila moundang sa pagpangita niini.