DUHA ka mga bata ang gideklarar nga dead on arrival samtang nakabsan gihapon og kinabuhi sulod sa balay tambalanan ang driver human sa bangga nga natigayon niadtong kasaulogan sa Pasko mga alas 11:25 sa buntag, Disyembre 25, sa Purok-9, Barangay Nangka, Villanueva, Misamis Oriental.
Ang panagbangga gilangkuban sa Mitsubishi Fuso Fighter truck nga gimaneho ni Royme Opaon, 60, minyo, taga Patrocenio, Claveria Misamis Oriental ug usa ka motorsiklo nga Yamaha Vega gimaneho ni Raymundo M. Pagulayan, 58, taga Tagoloan, Misamis Oriental.
Sa iniyal nga imbestigasyon sa Villanueva Police Station, nasuta nga kining motorsiklo nga gimaneho ni Pagulayan ang paingon sa dalan sa Claveria diin sakay sila Nieves Ermita, 67; Riza J. Pagulayan, 20; dalaga; Ryza Pagulayan, 8 anyos ug Irish Sophia Bunos, 2 anyos pulos residente sa Tagoloan.
Apan giingong mi-overtake kini sa kurbada nga bahin sa dapit ug wala namatikdan nga patabo niini ang fighter truck nga paingon sa Villanueva proper hinungdan maayong pagkasapon sa walang bahin sa motorsiklo.
Nanglagpot ang mga sakay sa motorsiklo ug daling gipangdala sa Polymedic Hospital sa lungsod sa Tagoloan, apan dead on arrival nga gideklarar sa mga doktor ang 2 ug 8 anyos nga mga bata.
Dili sab tiaw ang kadaot sa lawas nga naangkon sa driver nga si Pagulayan ug pila ka oras ang milabay sulod sa ospital nakabsan gihapon kini sa iyang kinabuhi mga alas 12:25 sa udto.
Ang driver sa fighter truck detenado na karon panahona sa Villanueva Police Station kinsa gitakdang mag-atubang og patong patong nga kaso.