PATAY ang usa ka lalaki ug samdan ang ubay-ubay ka pasahero human nagligid ang usa ka multicab mga alas 3:30 sa hapon Disyembre 23, 2019 sa Barangay Lunotan, Gingoog City, Misamis Oriental.
Sa imbestigasyon, usa ka Suzuki multicab ang nawad-an og brake nga gimaneho ni Luzvimindo Cagula, 32, lumad nga taga Butuan City.
Sa inisyal nga imbestigasyon sa Gingoog City Police Station sa pagpanguna ni Police Lieutenant Colonel Ariel Phillip Pontillas, nasuta nga paingon sa city proper sa Gingoog ang multicab agi sa Gingoog-Claveria secondary road dihang nawad-an og brake sa patugbong nga bahin.
Sa kakusog niini sa dagan, nagligid maoy hinungdan nabali kini ug nanglupad ang atop dihang miabot sa ubos.
Nababagan kini sa usa ka reef van truck nga gimaneho sab ni Mark Kiven Monton, 30, ug trabahante sa Unipace Corporation.
Sa maong insidente, patay diha dayon giilang si Berto Tantiado, trabahante sa Superior Motor-Corp, Bayugan City branch samtang seryosong samaran ang laing pito ka mga kaubang trabahante nga giilang sila si Carlito Cagadas Rollon, 23, taga Purok 6, Marcelina, Bayugan City; Perlo Tadifa Secofe, 29, minyo, residente sa Purok 23, Poblacion, Bayugan City; Eduardo Dulor, Ryan Labos, Marian Antonio, Glenn Velasquez, ug Aron Luison.
Ning panahona, ang mga samdan anaa na sa balay tambalanan sa maong siyudad.