“GENERALLY peaceful.”
Kini ang paghulagway ni Police Regional Office director Police Brigadier General Rolando Anduyan kalabot sa selebrasyon sa Pasko niadtong Disyembre 25, sa Northern Mindanao.
Sa kapulisan, walay natala nga insidente may kalambigitan sa firecrackers sama sa illegal nga possession, pagamit, ug pagpamaligya niini. Walay natala nga stray bullet, illegal discharge of firearms, nasunog ug nasamdan gumikan sa pabuto.
Adunay mga na-report nga mga krimen sama sa pagpamato, pagpanigbas ug pagpangluba apan padayon ang imbestigasyon nga gihimo sa kapolisan karong panahona.
Gipaabot ni Anduyan iyang dako nga pasalamat sa publiko gumikan sa kooperasyon ug nahimong mabulokon ug malinawon ang kasaulogan sa Pasko.
Gidayeg sab niini ang iyang mga sakop sa kapolisan tungod sa pagmintinar sa kahapsay ug kalinaw sa rehiyon ug daghan ang lingaw nga misaulog sa kapaskohan kauban ang ilang tagsa tagsa ka mga pamilya.
Gihangyo sab sa kapolisan nga magbinantayon sa seguridad labina nga kagahapong adlawa mao ang selebrasyon sa anibersaryo sa New People’s Army (NPA) nga adunay dakong posibilidad nga daw maghatod ug kagubot.
Sa Cagayan de Oro
Nagpasalamat ang City Disaster Risk Reduction Management Office (CDRRMO) tungod kay walay narespondehang insidente nga nabuthan og firecrackers atol sa kasaulogan sa Pasko, Disyembre 25 tuig 2019.
Gibutyag ni Nick Jabagat, ulo sa CDRRMO, nga resulta kini sa pagdili sa pagpamaligya sa mga firecrackers ug tungod usab sa hugot nga kampanya batok niini.
“So far hangtod kagahapon (Disyembre 25) malinawon ang atoa pagsaulog sa pasko,wala mga related sa pagpabuto nga atoa narespondehan,” matud ni Jabagat. (uban sa taho ni Kris C. Sialana)