Babaye gilugos, kinatawo gikuryente

KASONG rape with robbery ang atubangon sa responsable nga nilugos sa usa ka babaye niadtong Disyembre 23 sa Barangay Macasandig, dakbayan sa Cagayan de Oro.

Gigapos ug gipakuryentehan pa ang pribadong parte sa lawas sa 29 anyos nga babaye kinsa niila sa suspek nga iyang kanhi ka relasyon nga taga Capisnon, Kauswagan ning dakbayan kinsa nagtaptap pa atol sa gihimong krimen.

Sa pakighinabi kang Police Major Ericson Sabanal, hepe sa Police Station 9 (PS9) sa Macasandig, gibutyag niini nga gipasaka na ang kasong pagpanglugos lakip pagpangawat batok sa suspek.

“E-file na namo ang case sa suspect rape with robbery, regular filing,” matud ni Sabanal.

Giingong nakigbulag ang biktima niining suspek tungod kay kulatado siya niini.

Posibleng nagselos ang suspek tungod kay duna nay pamanhunon nga Amerkano ang biktima.

“In love daw kuno ang laki, out of jealousy siguro kay duna nay fiancé nga Amerkano, dili makigbulag,” matud ni Sabanal.

Kahinumdoman nga gigapos ug gibunalan pa sa suspek ang biktima ug gipaslakan og butang ang iyang kinatawo.

Giingong nagpapatay-patay ang biktima atol sa panghitabo ug gidala sa suspek ang mga butang sa biktima sama sa laptop, cellular phone, kwarta, ug passport.

Nasayran nga nakadawat nalang og taho ang kapulisan gikan sa Madonna hospital human nga nadala ang biktima sa maong balay tambalanan ug gibalhin usab sa laing ospital sa may Velez Street tungod na sa gihimo sa suspek.

Sa pagsulat ning balita Huwebes, luwas na sa kakuyaw nga kahimtang ang biktima.