Diaz hapit na mo-qualify sa 2020 Tokyo Olympics

Lab-as pa gikan sa iyang pagsakmit sa gold medal sa Southeast Asian Games sa sayong bahin ning semanaha, ang Olympian weightlifting silver medalist nga si Hidilyn Diaz nagkaduol na sa tinguha nga makalabnot og luna alang sa 2020 Tokyo Olympics.

Kini human nga ang 28 anyos nga barbelista, sa kasamtangan, anaa na sa ikalimang dapit sa International Weightlifting Federation sa women’s 55kg division.

Hinuon sa teknikalidad, si Diaz haom na sa No. 2 nga luna tungod kay ang top four pulos man taga China, lakip na ang 2019 IWF World Championship gold medalists Zhang Wanqiong ug Liao Quiyun. Ubos sa lagda, usa lang ang makaparepresenta sa matag nasod.

Kon magpabilin siya sa top eight hangtod sa Mayo ning tuiga, klaro nga mo-qualify na siya sa matag upat ka tuig nga kompetisyon diin iyang tinguha nga malabwan pa niya ang iyang silver medal finish sa 2016 Rio Olympics ug posibling siya ang unang Pinoy athlete nga makahatag og Olympic gold medal sa nasod.

Nakuha ni Diaz ang ranking human sa dihang misalmot siya sa upat ka international competitions, apil na ang sa niaging Septiyembre sa Pattaya, Thailand, diin siya naka-bronze.

Iya karong target ang duha ka katapusang Olympic qualifiers nga mao ang Rome World Championships sunod buwan ug ang IWF Asian Championships sa Kazakhstan sa April.

Si Monico Puentevella, ang presidente sa Samahang Weightlifting ng Pilipinas, mipasabot nga aron pagsulod sa Tokyo Olympics kinahanglang mosalmot siya og unom ka qualifying events.

Anhi dinhi kuhaon ang scores ug ang top eight maoy madala sa Olympics.

Gihulagway ni Puentevella nga determinado si Diaz sa iyang tinguha nga gani mibalik kini sa iyang training sa wala pay pasko.

Sa kasamtangan, bugtong lang si EJ Obiena sa pole vault ang Pinoy athlete nga nakasiguro na sa 2020 Olympics.

Posibling si Diaz maoy mosunod. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph