WALA modap-ig sa kiliran ni Jhack Tepora ang haom nga selebrasyon sa pagsaulog sa Pasko.
Nakulit na gyud unta sa iyang alimpatakan ug sa hunahuna sa mga dumadapig nga anaa na sa saktong agianan ang gitawag og El Kapitan nga mogiya sa iyang tinguha nga makalangkat og world title.
Pero daw og sa kalit mikid-op ang kahayag sa dalan sa dihang gi-knockout siya ni Oscar Escandon sulod lang sa usa ka round niadtong Disyembre 22 didto sa Toyota Arena sa Ontario, California.
Daghang nasurprisa sa maong kapildihan ug mitumaw ang mga pagduda kon aduna bay kapabilidad si Tepora nga ma world champion.
Kini tungod kay si Escandon, gawas sa edad nga 35-anyos na, 15 ka buwan nga wala na makaaway. Migintang og 11 ka tuig ang pagkamaguwang ni Escandon ni Tepora.
Anaa sa Sugboanong fighter ang bintaha sa gitas-on, abilidad ug sa kabatan-on.
Sa lindog ni US-based boxing writer/columnist nga si Homer Sayson, gibutyag niniini nga ang Bovada, usa ka sports betting website, mibunga ang mopusta ni Tepora og $1800 modaog lang og $100 samtang kon adto sa kontra, ang $100 modaog og $850.
Pero sulod lang sa usa ka minuto sa first round, nabali ang pangagpas. Usa ka left hook ngadto sa bodega ni Tepora nga ang kasakit mikonektar sa iyang pangunora maoy nakatumba kaniya sa kanbas, ug wa dayon makabangon samtan nagping-it sa kasakit.
Sa interview, giangkon ni Tepora nga naantimano siya og igo sa kuto-kuto.
Mga boxing expert mihulagway nga usa ka liver shot ang nadawat ni Tepora diin sagad niini makasinati og delayed reaction ug mawad-an usab dayon sa panimuot.
Sa iyang pagbarog, pilit nga gidawat ni Tepora ang iyang kapildihan ug iyang gilamano si Escandon.
Kadto maoy unang kapidihan ni Tepora sa iyang 24 ka professional fights.
Apan wa kini magpasabot nga ang maong kapildihan maoy magbira kaniya sa kaalautan.
Gani magsilbi kining usa ka butang nga naghatag kaniya og leksiyon alang sa umaabot pa niyang mga away.
Sa sayo pa, gihan-ay na ni Jhack ug sa iyang asawa nga si Dinah ang ilang pagbakasyon dinhi sa Pilipinas.
Kahinam gyud unta kanila nga magbalon og kadaugan sa ilang paghiuli sa Sugbo, apan wa kini itugot sa kahigayonan.
Sa kasamtangan, si Jack ug Dinah ania na karon sa Sugbo uban sa ilang mga kabanay alang sa hamubong bakasyon ug selebrasyon sa Pasko.
Taliwala sa kapildihan, nagpabilin gihapon ang pagsalig ni Sean Gibbons, ang presidente sa MP Promotions, ngadto ni Tepora, ug sa ilang paghibalik unya sa Amerika, ang pagsuhid og balik sa programa alang ni Jhack maoy ilang unang buhaton.
Posibling ang pagpakig-rematch ni Escandon maoy han-ayon na usab og balik sa ilang kampo.
Sa kasamtangan, welcome home Jhack and Dinah.
Kalimti ang nahitabo sa tuig 2019 ug hangopa ang bag-ong ug paglaom sa 2020.