19 anyos napaig; 5 ka sunog miigo

USA ka batan-ong lalake napaig sa sunog alas 12 sa kaadlawon sa Pasko sa Sityo Abbia, Barangay Mambaling, Siyudad sa Sugbo.

Apan niana nang buntag sa Miyerkules, Disyembre 25, nakaplagan ang paig nga lawas ni Roberto Lucero ,19, nag-abang sa sa usa sa mga balay nga nasunog. Si SFO2 Emerson Arseo, on duty fire investigator, nibutyag nga untop alas 12 sa tungang gabii nila nadawat nila ang alarma ug gisaka ngadto sa second alarm 10 minutos gikan sa pagresponde.

Mga ala 1:04 sa kaadlawon gideklarar nga under control, apan nagpadayon sila pag-overhail hangtod nga hingpit napawong. Tulo ka mga balay ang nangaugdaw sa sunog nga nagsugod sa ikatulong andana sa balay sa usa ka Inday, subay sa estorya sa silingan nga si Victoriano Laborte.

Gitino pa ang sinugdanan sa kayo, matod ni Arseo.

Giangkon ni Arseo nga naglisod sila sa pagpasirit og tubig kay sudlonon ang dapit.

Nagtuo silang way naunsa sa sunog, apan mga alas 6 sa buntag nakaplagan si Lucero nga natabunan sa mga parte sa balay nga nauling.

Niresponde sa alarma si Police Master Sergeant Nicolo Gonzales sa Mambaling Police Station.

“Ang ilang gibasehan sa ig-agaw sa namatay ang tahi sa iyang baba. Duna man gud tahi ni sa baba si Roberto unya wala na magpakita kanila ang biktima..So, dako ang ilang pagtuo nga mao to ilang ig-agaw,” matod ni Gonzales.

Laing sunog usab ang miulbo sa bisperas sa Pasko sa Barangay Suba. Dali ra nga natabang sa miresponde nga mga fire volunteer sa Barangay Suba ang sunog sa Sityo Hala-Hala.

Si F01 Mark Stephen Sanchez, fire investigator, nga nahinabi sa Superbalita Cebu, niingon nga ang balay gipanag-iya ni Boy Herra. Iyang mga apo gituohang nagduwa og pusporo sa ikaduhang andana sa balay, diin ang karaang gitara ang nadagkutan ug nikaylap sa foam.

“Nakabantay ko ganina, Sir, nga ang akong mga apo misaka sa taas apan wala ko mag dahum nga dunay dalang lighter. Ambot asa to mga bataa nakakuha og lighter,”sulti ni Herra sa Superbalita Cebu.

3 KA SUNOG

Sa Dakbayan sa Mandaue, na-busy ang mga bombero sa pagtubag sa tulo ka mga sunog nga sa kinatibuk-an nidanyos og P711,000. Bisperas sa Pasko, nasunog ang Prince Warehouse nga nahimutang sa Barangay Alang-Alang, nga nidanyos og P660,000.

Base sa taho sa Bureau of Fire Protection (BFP) sa Dakbayan sa Mandaue, ang sunog nagsugod sa ilang I.T. office nga adunay gidak-on nga 55 square meters. Wa pa masuta unsay hinungdan sa sunog.

Nagsugod ang sunog alas 9:32 sa gabii sa Martes ug alas 9:40 sa gabii, gisaka ni Fire Insp. Frances Marie Sendrijas ang sunog ngadto sa 2nd alarm.

Alas 10:55 sa gabii gidekalarar nga under control ug alas 11:24 sa gabii hingpit nga napawong. Mga alas 9:35 sa buntag sa mao nga adlaw, nadawat sa kabomberohan ang alarma sa sunog sa Brgy. Banilad.

Nasunog ang opisina sa Justino Corporation, usa ka andana nga commercial building, nga nidanyos og P9,000.

Samtang sa Barangay Tingub dakbayan sa Mandaue, usa ka establisemento ang nasunog mga alas 3:30 sa hapon nga nidanyos og P42,000.

Naabo sa sunog ang light construction materials sa Procycle Enterprise.( BBT, JCT, KFD )

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph