MOABOT sa P14.9 milyones nga kantidad sa mga panginabuhian sa mananagat sa northern Cebu ang naapektohan human sa Bagyong Ursula.
Ang Bureau of Fisheries and Aquatic Resources (BFAR) Central Visayas nibutyag nga niabot sa 255 ka mga mananagat ang apektado sa maong kadaot nga gibilin sa maong bagyo.
Base sa pasiunang damage report sa maong ahensiya, usa sa naguba kini ilahang 800 squaremeters nga multi-species hatchery sa Kawit, Medellin diin nagkantidad ang kadaot sa P1.2 milyones.
Matod sa tigpamaba sa BFAR Central Visayas Alma Saavedra nga ang seaweed project o kining guso nga panginabuhian sa mga mananagat ang labing nagrabehan.
Sa amihanang Sugbo niabot sa 8.85 ektarya ang nadaot.
Naglakip kini sa mga lungsod sa Bantayan, Daanbantayan, Medellin, San Remigio ug Bogo City.
Niabot usab sa 119 ka motorized boats ang nangaguba samtang 12 ang dili motorized.
Lakip sa walo ka lungsod ug usa ka syudad nga apektado ang panginabuhian sa dagat ang Santa Fe ug Bantayan sa Isla sa Bantayan, Daanbantayan, Medellin, San Remigio, Tabogon, Compostela, Asturias, ug Bogo City. (HBL)