SUBSOB nga pagsusi ang gihimo sa kabomberohan sa Dakbayan sa Talisay sa mga accredited nga tindahan nga namaligya og pabuto alang sa nagkaduol nga pagsugat sa Bag-ong Tuig.
Gitug-an ni Fire Senior Inspector Arra Alpajaro, fire marshall sa Talisay City Fire Station (TCFS), tulo lang ka mga retailer ang nikuha og permit alang sa pag-display o pagpamaligya sa pabuto.
Duha niini ang makita sa parking area sa South Town Center sa Barangay Tabunok ug ang usa sa atubangan sa edipisyo sa Starmall.
Gisusi pud karon sa kabomberohan ang mga kabalayan diin posibleng aduna'y ilegal nga namaligya og pabuto.
Kanunay nga mohimo og kinalit nga inspeksyon ang mga sakop sa TCFS aron pagsiguro nga nasunod sa mga retailer ang mga anaa sa rekisitos, sama sa pagpanag-iya og prescribed fire extinguisher ug pag-andam og balde sa tubig sa tindahan.
Ginadili ang bisan unsa nga pagdagkot, ilabi na ang sigarilyo, 15 metros gikan sa display center. Labaw nga ginadili ang pag-testing sa mga pabuto ug pyrotechnics.
Gidili usab ang mga stove, exposed flames ug portable electric heater duol sa display sa mga pabuto.
Gitataw ni Alpajaro nga uban sa ilang mga bombero nga sakay sa ilang fire truck ang nituyo sa mga kabalayan, ilabi na sa mga sudlunon nga dapit, pagpahinumdom alang sa luwas nga pagsaulog sa Pasko ug Bag-ong Tuig.
Kadtong masakpan nga namaligya og pabuto sa dili designated area ug wala usab permit ang sikopon sa kapulisan ug kompiskahon apil ang mga baligyang pabuto. (FMD)