KADAUGAN maoy misugat ni Luka Doncic sa iyang pagbalik human sa duha ka semana nga pagpaalim sa napiang niyang tikod niadtong Disyembre 14.
Kagahapon si Doncic mitali og 24 puntos, 10 ka rebounds ug walo ka assists aron giyahan ang Dallas Mavericks ngadto sa 102-98 nga kadaugan batok sa San Antonio Spurs sa nagpadayon nga NBA season.
Human mabiyai, 102-85, ang Spurs sa kalit lang mipahagsa og 13-0 nga rally nga giduslitan sa duha ka tres ni Rudy Gay naghatag og hudlat sa Mavericks.
Nisamot ang kakulba sa mga dumadapig sa Mavs sulod sa American Airlines Travel Center sa dihang nasipyat si Doncic sa iyang duha ka free throws, pipila ka segundos ang nahabilin.
Apan hingpit nga nasilyo ang ilang kadaugan human igo lang misimhot sa ring ang tres ni Derrick White sa katapusang sais segundos ug ilang napoupo ang ika-20 ka daog sa 30 ka duwa nga nakapahaom kanila sa ikalimang puwesto sa Western Conference. Samtang ang Spurs (12-18) pabilin nga namidpid sa ikasiyam nga luna.
Si Doncic, ang kasamtangang rookie of the year awardee, misulod sa korte nga nag-average og 29.3 points, 9.6 rebounds ug 8.9 assists.
Ang coach sa Dallas nga si Rick Carlisle mibutyag nga wa siyay restriction sa playing time ni Doncic kinsa igo lang nakaduwa og 1:40 batok sa Heat human siya nakaangkon sa injury sa iyang tikod.
Sa temporaryong pagpalta ni Doncic, ang Dallas mitali og 2-2 nga record.
“We’ll see how things go,” matod ni Carlisle. “With it being a national (television) game and longer timeouts, that helps. He practiced (Tuesday) without issue.”
Samtang sa laing duwa, naputol ang 11 ka sunodsunod nga kapildihan sa Minnesota Timberwolves pinaagi sa pagpatapsing sa Sacramento Kings, 105-104, sa duwa nga miagi og duha ka overtime.
Kini nahimo sa T-Wolves nga wala ang usa sa ilang sinaligan sa ilawom nga si Karl-Anthony Towns kinsa wala makaduwa sa ikalimang higayon tungod sa injury niini sa tuhod.
Si Gorgui Dieng mipupo og 21 puntos, 10 ka rebounds ug pito ka assists, Robert Covington nakatampo go 19 puntos samtang mitapos usab si Andrew Wiggins nga may 18 puntos.
Sa laing mga duwa, gilubong og 30 puntos sa Pistons ang Wizards, 132-102 samtang gikuniskunis usab sa New York Knicks ang Brooklyn Nets, 94-82.
Gipahilum usab sa Grizzlies ang Thunder, 110-97, ug nakaipsot ang Utah Jazz sa uwahing rally sa Portland TrailBlazers, 121-115. (JBM)