HUMAN ang sobra ka busy nga semana tungod sa trabaho, buot ko lamang nga igahin ang panahon sa pag-relax uban ang mga higala.
Usa ka gabii, kauban nako sila Iresse, suod nga higala sa kolehiyo, sa Stre3ts Urban Lifestyle Pub.
Kauban sab niya ang mga higalang sila Louie ug Alfie nga nahimamat sab nako kaniadto. Anaa sab si Ian Garcia, Mindanao Times columnist ug Davao Digital Influencer president.
Nalingaw kami samtang namingaw sa musika sa Acoustic Theory.
Apan paglabay ang pipila ka oras, nakadesidar kaming mokaon sa Bankerohan Public Market ug tilawan ang lechon kawali o bulalo.
Taud-taud na akong nagpuyo sa Davao, apan kini ang unang beses nga nakatunob ako sa mga gihisgutang kan-anan sa Bankerohan nga bukas bisan dis-oras sa gabii aron idalit ang kahinam sa pagkaon sa mga Dabawenyos.
Makahingangha nga pag-abot namo sa dapit, puno ang karenderya.
Mga Dabawenyos maikagong naglinya samtang nagkapuliki og pili sa pagkaon nga kaunon.
Ang kan-anan nga among giadtuan mao ang Paz Eatery and Bulalo nga usa sa gidugok og maayo.
Sa among pag-abot, wa akoy plano nga mokaon, apan sa pagbalik ni Ian sa lamesa samtang bitbit ang pork liempo, humba, ug hinalang, nausab ang akong huna-huna og mi-order ako.
Sa food counter naglinya ang nagkadaiyang putahe sama sa humba, escabeche, pinakbet, bulalo, hinalang ug uban pa.
Mi-order ako og humba uban ang kan-on, nga lami kaayo! Sakto sa kahumok ang karne, ug nagpamaak ang lasa niini.
Gitilawan sab nako ang pork liempo ni Ian nga tagumkom kaayo.
Ang food trip nako sa Bankerohan dili lamang sa lamiang pagkaon, apan usa ka kasinatian kanako.
Usa kini sa mga lugar sa dakbayan diin ma-enjoy nimo ang lamiang pagkaon, uban ang imong higala, pamilya ug uban pa.